Президентнинг расмий ташрифи арафасида 29 июль куни Минскда Ўзбекистон — Беларусь ҳудудлараро форуми бошланди.
Унда икки мамлакат ҳудудлари вакиллари қаторида парламентлар аъзолари, вазирлик ва идоралар мутасаддилари, ишбилармонлар иштирок этмоқда.
Форумнинг дастлабки куни сессия йиғилишлари шаклида ўтди.
Саноат кооперацияси масалаларига бағишланган биринчи сессияда қишлоқ хўжалиги, машинасозлик, электротехника, фармацевтика каби соҳаларда шериклик алоқаларини кенгайтириш хусусида сўз борди.
Иккинчи сессия аграр соҳага бағишланди. Унда қишлоқ хўжалиги маҳсулотлари етиштириш ва қайта ишлаш, ўсимликшунослик, селекция, чорвачилик, ветеринария соҳаларидаги ҳамкорлик истиқболлари муҳокама қилинди.
Гуманитар, ахборот-коммуникация, илм-фан соҳаларидаги алоқаларни ривожлантириш масалалари бўйича ўтказилган йиғилишда технопаркларни такомиллаштиришда тажриба алмашиш, ҳудудлараро инновацион ҳамкорликни кенгайтириш, туризм, таълимни рақамлаштириш каби истиқболли йўналишлар ҳақида фикр алмашилди.
Форум бугун ўз ишини давом эттиради.
Изоҳ (0)