Samarqandda 10 kunlik kelinchakni ayovsiz kaltaklagan erga nisbatan 24-iyul kuni sud hukmi o‘qildi. Sputnik’ning xabar berishicha, erkakka uch yil-u sakkiz oy ozodlikdan mahrum qilish jazosi berildi.
Xabarda aytilishicha, hukm o‘qiladigan kuni erkakning birorta qarindoshi sud majlisida qatnashmagan. Sudya o‘z hukmini e’lon qilganidan so‘ng, erkakning advokati kelin tomondan mijozi uchun rahm-shafqat so‘ragan, ammo kelin uni kechirmagan.
Eslatib o‘tamiz, Samarqand viloyati Bulung‘ur tumanida to‘ydan 10 kun o‘tgach yosh kelinchak eri tomonidan ayovsiz kaltaklangan va tuman kasalxonasining reanimatsiya bo‘limiga tushgan edi.
1988-yilda tug‘ilgan Zuxra Umarovaning yuzida sog‘ joy qolmagan, ko‘zlari dahshatli shishib, qontalash bo‘lib ketgan edi. Uni bu holatda hatto tuqqan onasi ham tanimagan.
Umarovaning onasi o‘sha vaqtda huquqni muhofaza qilish organlariga qilgan murojaati besamar ketgan, onaga qizini davolatish va “o‘ziga qimmatga tushishi bois tibbiy ekspertizani o‘tkazmaslik” maslahat berilgan.
Izoh (0)