Бу йил Ўзбекистон биринчи маротаба ўз ҳудудида бутун жаҳон бўйлаб оммалашиб бораётган Халқаро армия ўйинларини ўтказишга ҳозирлик кўрмоқда. Бу ҳақда «Дарё»га Мудофаа вазирлиги Ахборот ва оммавий коммуникациялар департаменти маълум қилди.
Жиззах вилоятида жойлашган «Фориш» тоғ полигони «АрМИ-2019» доирасида ўтказиладиган «Ҳарбий-тиббий эстафета» мусобақаси иштирокчиларини кутиб олмоқда.
Халқаро мусобақани ўтказиш учун яратилган замонавий ва қулай шарт-шароитлардан ташқари полигонда Ўзбекистоннинг барча вилоятлари диққатга сазовор кўргазмалари билан йиғилган.
12 та вилоят, Қорақалпоғистон Республикаси ва Тошкент шаҳри миллий анъана ва удумлари, асрлар давомида сақланиб келинаётган меросларини намойиш қилмоқда.
Шунингдек, меҳмонлар бу ерда миллий сувенир буюмларини харид қилиш учун ҳам имконият мавжуд.
Ҳар оқшом Мудофаа вазирлиги ҳамда Жиззах вилояти ҳокимлиги томонидан мусобақа қатнашчилари учун маҳаллий ва ҳарбий эстрада гуруҳлари иштирокида концерт дастурлари уюштирилмоқда.
V Халқаро армия ўйинлари «Ҳарбий-тиббий эстафета» танловининг очилиш маросими 4 август куни бўлиб ўтади.
Изоҳ (0)