Ўзбекистонда 6 ой давомида 333 киши судлар томонидан оқланди

Ўзбекистонда жорий йил биринчи ярим йиллигида жиноят ишлари бўйича судлар томонидан 18745 нафар шахсга нисбатан 14 мингдан зиёд иш кўриб чиқилди. Мазкур кўрсаткичлар 2018 йилнинг шу даврига нисбатан шахслар бўйича 29,1, ишлар бўйича эса 29,7 фоизга камайган. Бу ҳақда Олий суд матбуот хизмати маълум қилди.

6 ой давомида 333 нафар шахс оқланди ва реабилитация қилинган. Судланган шахслар сони 14 минг 733 нафарни ташкил этиб, шундан 3,7 мингдан ортиғи озодликдан маҳрум қилинган. 10 мингдан ортиғига бошқа турдаги жазолар тайинланган. 744 нафар шахс шартли ҳукм қилинган.

Судланган шахсларнинг 13 мингдан зиёди эркак, 1,7 мингдан ортиқроғи аёл, 6 мингга яқини ёшлар (шу жумладан, 272 нафари вояга етмаган), 438 нафари 60 ёшдан ошган шахс.

Шунингдек, 1,5 мингдан ортиқ шахс озодликдан маҳрум этиш билан боғлиқ бўлмаган жазолар тайинланиши муносабати билан суд залидан озод қилинган. 13 минг 346 нафари жазони ўташдан муддатидан илгари шартли озод қилинди, 4 мингдан ортиғига тайинланган жазо енгили билан алмаштирилган. 3,5 мингдан зиёд шахсга нисбатан дастлабки тергов органлари томонидан асоссиз равишда қўйилган моддалар айбловдан чиқариб ташланди ёки қайта малакаланди.

Айрим жиноят турлари ўтган йилнинг шу даврига нисбатан камайгани кузатилган. Хусусан, қасддан одам ўлдириш, босқинчилик, талончилик, ўзлаштириш ёки растрата йўли билан талон-торож қилиш, фирибгарлик, ўғрилик, мансаб сохтакорлиги, ҳокимият ёки мансаб ваколатини суиистеъмол қилиш каби жиноятлар учун судланганлик кўрсаткичлари ҳақида шундай дейиш мумкин.

Ярашув институтининг самарали қўлланилиши натижасида 3228 нафар шахс жиноий жавобгарликдан озод этилган.

Етказилган 286,8 миллиард сўмдан ортиқ моддий зарарнинг ўрнини қоплаган 1693 нафар шахсга нисбатан озодликдан маҳрум қилиш билан боғлиқ бўлмаган жазо тайинланган.

6677 та жиноят иши, яъни барча ишларнинг қарийб 46,8 фоизи сайёр суд мажлисларида кўриб чиқилган.

Олий суд жиноят ишлари бўйича судлов ҳайъати томонидан назорат тартибида 879 нафар шахсга нисбатан 696 иш кўриб чиқилган. 552 нафар шахсга нисбатан қуйи судлар томонидан чиқарилган қарорлар бекор қилинган, 242 нафар шахсга нисбатан чиқарилган суд қарорлари эса ўзгартирилган.