Ўзбекистон Ташқи ишлар вазирлиги Жанубий Кореяда тунги клуб конструкцияси қулаши оқибатида ҳалок бўлганлар ва жабрланганлар орасида ўзбекистонликлар йўқлигини маълум қилди.
Ўзбекистоннинг Сеул шаҳридаги Элчихонасининг Консуллик бўлими берган маълумотга кўра 2019 йилнинг 27 июль куни Кванджу шаҳридаги (Корея Республикаси) тунги клублардан бирида юз берган бино қисмининг қулаб тушиши оқибатида ҳалок бўлган ва жароҳатланганлар рўйхатида Ўзбекистон фуқаролари, жумладан сув спорти турлари бўйича жаҳон чемпионатида иштирок этаётган Ўзбекистон спорт делегацияси аъзоларининг номлари йўқ. Шаҳар полицияси ҳам ушбу маълумотни тасдиқлади.
Жанубий Корея ҳуқуқни муҳофаза қилиш органлари хабарига кўра мазкур ҳодиса оқибатида 2 киши ҳалок бўлган, 17 киши, жумладан 9 нафар жаҳон чемпионатининг хорижлик иштирокчилари жароҳат олган.
Консуллик-ҳуқуқий департаменти Корея Республикаси ҳудудида бўлиб турган Ўзбекистон фуқароларига улар зарурат туғилган ҳолатларда Сеул шаҳридаги Элчихонага қуйидаги телефон рақамлари орқали мурожаат қилишлари мумкинлигини эслатиб ўтади: +82-02-574-65-54, +82-02-577-36-60.
Аввалроқ жабрлангарлар орасида икки нафар Ўзбекистон фуқароси ҳам борлиги, лекин улар спортчилар эмаслиги хабар берилган эди.
Изоҳ (0)