«Юксалиш» ҳаракати аҳоли ва ҳокимият вакилларининг «очиқ конфронтацияси»дан ташвишда эканлигини билдирди

«Юксалиш» умуммиллий ҳаракати раиси Акмал Бурҳонов Ўзбекистонда аҳоли ва ҳокимият вакилларининг очиқ конфронтациясига сабаб бўлаётган кўчмас мулкларни оммавий бузиш жараёнларидан ташвишда эканини маълум қилди.

«Ҳудудларни комплекс ривожлантириш дастурларини ижро этишга масъул алоҳида маҳаллий бошқарув органларининг тартибсиз ҳаракатлари, шу жумладан, қонунда белгиланган тартибларга зид равишда огоҳлантиришларсиз, компенсацияларни тўлиқ тўламасадан, бир сўз билан айтганда, уй эгалари ва тадбиркорларнинг розилигини олмасдан хусусий ер участкаларининг давлат ҳамда жамоат эҳтиёжлари учун олиб қўйилиши ҳолатларини кузатяпмиз», — дейилади ҳаракат томонидан тарқатилган баёнотда.

Акмал Бурҳоновнинг таъкидлашича, шаҳар ва туманлар, қишлоқлар ва маҳаллаларни ободонлаштириш позитив жараён, бироқ «қатор зиддиятли ва кенг резонанс уйғотган Яккабоғдаги икки ҳолат, Риштон, Янгийўл туманлари ва Урганч шаҳридаги фуқаролар ва ҳокимият вакилларининг очиқ конфронтацияси каби ҳолатлар ҳаммамизни ташвишлантирмоқда».

Ҳаракат раиси маҳаллий ҳокимият органлари томонидан доимий тарзда йўл қўйилаётган камчиликларни санаб ўтди:

• қисқа давр ичида бир ҳокимнинг рухсати билан қурилган иншоотларнинг бошқа бир ҳокимнинг қарори билан бузилиши;
• объэктларнинг бузилиши ҳақида қонуний огоҳлантириш берилмаслиги;
• тарихий аҳамиятга эга бўлган объэктларнинг бузилиши;
• фуқароларнинг розилигисиз бошқа турар жойларга мажбурий кўчирилиши;
• бузилаётган уйлар учун компенсация пулларининг вақтида берилмаётганлиги ёки унинг миқдорлари сезиларли даражада камлиги;
• ҳокимият вакилларининг уй-жой эгалари билан қўпол муносабатда бўлиши, элементар мулоқот маданиятининг йўқлиги ва бошқа кўплаб муаммолар.

Акмал Бурҳоновнинг сўзларига кўра, «Юксалиш» умуммиллий ҳаракати бу каби ҳолатларга барҳам беришга йўналтирилган тизимни яратиш бўйича таклифларни ишлаб чиқмоқда. Жумладан:

• ҳудудларни узоқ йиллик стратегик ривожлантириш режалари, бош планларини ишлаб чиқиш;
• ер участкаларининг давлат ҳамда жамоат эҳтиёжлари учун олиб қўйилиши жараёнларининг очиқ ва шаффофлигини таъминлаш, ушбу жараёнларда аҳоли иштирокини кенгайтириш;
• ҳудудларни ривожлантириш лойиҳалари ва дастурларини аҳоли иштирокида презентациялари ва муҳокамаларини ташкил этиш;
• ушбу масала билан боғлиқ қонунчилик ижроси юзасидан парламент ва депутатлик назоратини кучайтириш;
• тарихий аҳамиятга эга бўлган иншоотларни бузишга мораторий эълон қилиш;
• маҳаллий ҳокимият органлари иш самарадорлигини баҳолаш аҳолининг ишончи ва розилиги асосида амалга оширилиши бўйича тартибни жорий қилиш.

«‘Юксалиш’ умуммиллий ҳаракати муаммога алоқадор барча томонлар, фуқаролар, маҳаллий ҳокимият органлари, жамоат ташкилотлари ва жамоатчилик кенгашлари, қурувчи ташкилотлар, депутатлар, шунингдек халқаро ташкилотлар вакиллари иштирокида муҳокамаларни ташкил қилишни режалаштирилмоқда», — дея маълум қилди Акмал Бурҳонов. Ушбу масала бўйича таклиф ва мулоҳазаларни info@yumh.uz электрон почта манзилига ёки Telegram’даги @yuksalishuzb_bot ботига юбориш мумкин.