Яқинда ижтимоий тармоқларда Наманган вилояти Поп туманида тадбиркор Сардор Раҳмонов томонидан амалга оширилган ишларни қоралашга қаратилган чиқишлар пайдо бўлди. Исми шарифи Шоҳрухбек бўлган фойдаланувчи тадбиркор қилган ишлари билан гўёки одамларга, бошқа тадбиркорларга жабр етказди, деган иддаони илгари сурган.
ЎзАнинг ёзишича, Поп туманида 2019 йилда қурилиши тугалланиб, ишга туширилган «Поп савдо маркази» тумандаги эски бозор ўрнида эмас, балки мутлақо бошқа жойда қад ростлади. Марказнинг қурилиши учун ҳеч кимнинг ери тортиб олинмаган ёки уйи ҳам, дўкони ҳам бузилмаган.
Таъкидланишича, «Поп савдо маркази» қурилишидан олдин унинг лойиҳаси Шавкат Мирзиёевнинг Наманган вилоятига ташрифи доирасида тақдимоти ўтказилган. Ўшанда ёш тадбиркор Сардор Раҳмонов Поп туманида 15 гектар ерни қамраб оладиган замонавий савдо маркази ва Экологик парк лойиҳаси ҳақида сўзлаб берган.
«Поп савдо маркази» ушбу лойиҳа асосида қурилган бўлиб, туман аҳолининг кўплаб ҳаётий эҳтиёжларини қондирадиган замонавий мажмуага айланган. Унгача туманда бундай йирик савдо мажмуаси бўлмаган. Одамлар бозор-ўчар қилишда ёзда чанг, қишда лой бўлган бозорга бориб, ўзи қийналгани етмагандай, машинасини тўхтатишга жой тополмай келган.
Шу сабабли нафақат озиқ-овқат, қишлоқ хўжалиги маҳсулотлари, балки уй-рўзғор буюмларидан тортиб кийим-кечаккача харид қилиш мумкин бўлган, шу билан бирга барча қулайликларга эга обод бу марказнинг очилишини аҳоли мамнунлик билан кутиб олган.
Мажмуанинг ўзига хос томони – у фақат тижорат мақсадидаги савдо дўконларидан иборат эмас. Бу ерда замонавий автотураргоҳ, меҳмонхона хизмати, энг эътиборлиси, халқимизга айни дамда энг муҳим масалаларда хизмат кўрсатаётган Давлат хизматлари маркази ҳам шу ерда жойлашган.
Тадбиркор бу савдо марказини қуриш учун тинимсиз меҳнат қилиб, банкдан кредит олган. Энди тадбиркор меҳнатининг самарасини қўриши, олинган кредитни қайтариши керак. Бироқ энди иш бошлаган мажмуа кимларгадир ёқмаётгани, тадбиркорга тош отиб, уни бадном қилишга уриниш ҳолатлари учрамоқда. Тадбиркорни «қоралаш акцияси»да ёш тадбиркор кредит олиб, жуда кўп иш қилиб юборгани иддао қилинган.
Изоҳ (0)