Ўзбекистон Адлия вазирлигида 27 июль куни навбатдаги кенгайтирилган ҳайъат мажлиси бўлиб ўтди. Вазирликнинг Жамоатчилик билан алоқалар бўлимидан хабар беришларича, мажлисда адлия вазири Русланбек Давлетов бугунги куннинг энг долзарб масалаларидан бўлган жойларда уй-жойлар бузилишларига эътиборни қаратди. Бу масалани ҳар бир адлия органи ходими алоҳида устувор вазифа сифатида ўзига белгилаб олиши зарурлиги таъкидланди.
Адлия вазирининг сўзларига кўра, адлия тизими бу муаммонинг кўлами бугунги кундагидек бўлишидан уч ой олдин ўз таҳлилларини ва чораларини бошлаган эди. Хусусан, 2019 йилнинг май—июнь ойларида кўчмас мулк ҳуқуқини ҳимоя қилиш бўйича акция ўтказилган. Акция доирасида мурожаатларни кўриб чиқишда 874 та қонунбузилиш ҳолати аниқланган. Натижада мулкдорларнинг манфаатларида 236 та тақдимнома, 100 та огоҳнома, судларга 360 та даъво аризалари киритилиб, 30,3 миллиард сўм ундириб берилган. «Бу натижалар албатта хамир учидан патир ёки денгиздан бир томчидек гап», — дейилади вазирлик ахборотида.
Мулк дахлсизлигини таъминламасдан иқтисодий ривожланган давлатнинг ўзи йўқ бутун дунёда. Бу эса бизнинг қонунларимизда битилган энг олий нормалардан биридир ва барча муносабатлар тўлалигича тартибга солинган. Лекин амалда ушбу тартиб ва қоидалар мутасаддиларнинг эсидан чиқиб кетди. Натижада уй-жой масаласида қонун устуворлигига жиддий путур етди.Амалиётдаги муаммолардан, билдирилган фикр мулоҳазалардан келиб чиқиб вазир Русланбек Давлетов адлия органлари ходимлари олдида турган муҳим вазифалар алоҳида тўхталиб, қуйидагиларни билдирди:Бу нима деган гап? Одамларнинг уйини бузиб, кўчага чиқариб қўйиб, компенсация тўламаслик — ахир бу ваҳшийлик-ку. Бу ҳеч қандай қонунчиликка тўғри келмайди, бу ҳеч бир одамийлик тамойилига ҳам тўғри келмайди, бу Ўзбекистон тан олган халқаро ҳужжатларга ҳам тўғри келмайди!
Ҳамма шаҳарлар янгидан қурилади, эскиси бузилади, ободонлашади, бу табиий жараён, барча жамиятларга хос бўлган ҳолат. Лекин, XXI асрда яшаётган сивилизацион жамият сифатида барча ҳаракатлар учун қонун энг асосий мезон бўлиши керак, одамлар ҳуқуқларини поймол қилиш эвазига, қонунни бузиш эвазига ҳеч қандай қурилиш ёки ободонлаштириш бўлиши мумкин эмас...
...Кейин яна бир жиҳатни эътиборга олинглар — гап фақат моддий бойлик бўлмиш иморатда эмас, уй-жой билан инсонларнинг шу уй билан боғлиқ хотиралари ҳам ўчирилади. Туғилиб ўсган жой, ёшликда ўйнаб кулиб юрган ҳовли, болаликдаги хотиралар, керак бўлса ҳар бир хонадоннинг ҳиди инсон учун қадрли, кўп уйлар авлоддан авлодга ўтиб келяпти, бу юксак шахсий номоддий бойлик ва инсон ҳаётидаги ажралмас хотиралардир.
Русланбек Давлетов, адлия вазири
Русланбек Давлетов, адлия вазири
- Барча маҳаллий ҳокимликларни фуқароларни уй-жой билан боғлиқ қонуний ҳуқуқларини поймол этишларга чек қўйишларини талаб қиламиз;
- Бутун адлия тизими раҳбарлари, мутасаддилари ва ходимларини ўз ваколатларидан тўлиқ фойдаланган ҳолда, уй-жойлар бузилиши жараёнида Ўзбекистон қонунларига амал қилиш юзасидан чоралар кўришларига чақираман.
Изоҳ (0)