Соғлиқни сақлаш вазирлиги томонидан Ахборот ва оммавий коммуникациялар агентлигида Президентнинг «Тиббиёт ва фармацевтика таълими ва илм-фани тизимини янада ривожлантириш чора-тадбирлари тўғрисида»ги қарори мазмуни-моҳияти ва ижросига бағишланган матбуот анжумани бўлиб ўтди.
Унда тақдим этилган ҳисоботга кўра, мамлакатда тиббий соҳада муаммолар йўқдек, лекин ҳақиқатан ҳаммаси шундайми?
Анжуманда қайд этилишича, сўнгги 3 йил давомида тиббиёт соҳасига оид 140 дан зиёд фармон, қарор ва фармойиш қабул қилинган. Соҳани ривожлантириш учун барча зарур чора-тадбирлар кўрилмоқда.
Аммо маҳаллий поликлиникаларга чиқар эканмиз, ўзгаришлар ҳисоботда кўрсатилганидек эканлигига шубҳа туғила бошлади. Мисол учун, аввал анкеталар тутилар, беморнинг ҳолати кичик дафтарга қайд этиларди. Кейинчалик ҳамма маълумотлар компьютерда қайд этиладиган бўлди. Бу билан шифокорлар уюм-уюм қоғозлардан қутулди, деб ўйласангиз, янглишасиз.
Шифокор, ҳамширалар энди қайдларни электрон ҳамда қоғоз тарзда ҳам олиб бормоқда. Уларнинг иши енгилладими? Бу худди машина сотиб олиб, уни ҳайдамасдан, орқасидан итариб юришга ўхшайди.
Тиббиёт йўналишида таълим олган талабалар вилоят ва чекка қишлоқларга ишлаш учун кетади. Айнан чекка қишлоқдаги поликлиника ёки касалхонага ишга жойлашгач, иш жойидан ўқув даргоҳига маълумотнома ҳам олиб бориб беради.
Шароити ҳаминқадар бўлган чекка қишлоқдаги врачлик пунктига жойлашган янги шифокор ўқув жойига ҳисоботини етказгач, жуфтакни ростлайди.
Қишлоқларда шифокор етишмаслиги муаммоси эса яна долзарблигича қолаверади.
Айни муаммо бўйича эса анжуманга йиғилган мутасаддилар шундай жавоб берди. Яъни уларга кўра, эндиликда битирувчи талабаларга ўз вилоятида ишга жойлашиб, 5 йил давомида ўша ерда ишлаш мажбурияти қўйилмоқда.
Аммо мазкур муаммони мажбурият эмас, имтиёзлар билан ҳал этган яхши эмасми? Зора шу орқали қишлоқларда ҳам тиббиёт марказлари яхшиланса, ёш шифокорлар ҳам ишдан бўшаб шаҳарга қочиш тараддудида бўлмас.
Анжуманда айтилишича, айни вақтда мамлакатда тиббиёт соҳаси учун 7 та олий тиббий таълим муассасаси ва уларнинг 4 та филиалида малакали кадрлар тайёрланмоқда.
2018 йили Тошкент тиббиёт академиясининг Термиз филиали очилиши, академиянинг Фарғона филиалида қабул жараёнининг қайта тикланиши ҳудудлардаги тиббиёт муассасаларини малакали кадрлар билан таъминлаш имкониятини кенгайтирган.
Ҳисоботга кўра, жорий йилда бакалавр таълими йўналишига жами 4490 та жой ажратилган. 2019 йил 16 июль ҳолатига кўра, ДТМнинг расмий веб-сайтидаги маълумотларга асосан, 1-таълим йўналиши бўйича танланган абитуриентлар сони 62 461 нафарни ташкил этган.
Рақамлардан кўриниб турибдики, тиббиёт бўйича таълим олишни истаганларга нисбатан таклиф қилинаётган ўринлар анча кам.
Вилоятлардаги касалхоналарда эса малакали кадрлар етишмаслиги масаласи ҳамон долзарб. Шаҳардаги касалхоналарда ҳам малакали шифокорлар қабулига навбатлар кўп.
Изоҳ (0)