Хоразм вилояти маркази Урганч шаҳрининг Ашхобод кўчасида яшаган ва ерлари давлат эҳтиёжлари учун қайтариб олинган аҳолига компенсация пуллари тарқатила бошланди. Бу ҳақда «Kun.uz» хабар бермоқда.
Аввалроқ Чондирқиёт қишлоғи ҳудудига кўчириб юборилган ва далада палатка ва чартак (капа) қуриб яшаётган, аммо 1—2 ойдан бери компенсация пулини ололмаётган аҳоли ва ҳокимлик ўртасида можаро юзага келгани, норози аҳоли 26 июль куни «Урганч—Хонқа» йўлини ёпиб қўйгани ҳақида хабар берилган эди.
Шундан сўнг вазиятга Хоразм вилояти ҳокими Фарҳод Эрманов аралашиб, 10 августгача компенсация бўйича тўлиқ ҳисоб-китоб қилинишини билдирган эди. Кейинроқ Президент Шавкат Мирзиёев Хоразмда юзага келган вазиятни ҳал қилиш учун бош вазир Абдулла Ариповни ҳудудга юборгани маълум бўлди.
Хабар беришларича, 27 июль куни тушдан кейин Миллий банкнинг Урганч бўлими ходимлари томонидан компенсация пуллари тарқатила бошланан. Жараённи Президент топшириғи билан Хоразмга келган бош вазир Абдулла Арипов ҳам кузатган; у аҳоли билан учрашиб, суҳбатлашган.
Режага кўра, 27 июлнинг ўзида 207 та хонадон эгасига келишув шартномасида кўрсатилган компенсация пулининг 50 фоизи миқдорида — жами 21 миллиард сўм тақсимлаб берилади. 10 августгача эса, аввал хабар қилинганидек, барча хонадон эгалари билан 100 фоиз ҳисоб-китоб қилиниши режалаштирмоқда.
Хоразм вилояти ҳокимлиги одамлар билан тўлиқ ҳисоб-китоб қилиш учун Республика бюджетидан қўшимча маблағларни жалб қилган. Жами 394 та хонадон эгаси 70 миллиард сўмдан ортиқ компенсация пулини олиши кўзда тутилган.
«Қайд қилиш жоизки, фуқароларга пул маблағлари рўйхат бўйича тарқатиляпти. Улар томонидан пулнинг қабул қилиниш жараёни видеокамералар орқали ёзиб олиняпти», — дейилади хабарда.
Изоҳ (0)