Ўзбекистонда илк маротаба смартфонга ўрнатилган дастур ёрдамида суғориладиган экинлар ҳолати, қачон ва қанча сув бериш кераклиги аниқланиб, зарур амалиётлар бажарилади. Далалардаги экинлар ва боғларни томчилатиб суғоришни энди жорий этилган компьютер технологиялари орқали бошқарса бўлади. Бу ҳақда «Дарё»га журналист Наргис Қосимова маълум қилди.
Андижон вилоятида Европа Иттифоқи ва Германия ҳамкорлик ташкилоти (GIZ) қўшма лойиҳаси доирасида сув ресурсларини бошқариш бўйича ирригация тизимлари сув хавзалари вакилларига интенсив боғларни суғоришда сувни тежовчи янги технологиялардан фойдаланишни ўргатишга йўналтирилган семинар-тренингда ана шу мобил дастурдан фойдаланиш қоидалари ўргатилди.
— Норин-Қорадарё ирригация ҳавзаси бошқармасининг 6 гектарлик боғдорчилик намойиш участкалари анъанавий эгатлаш, ёмғирлаб, томчилаб суғориш бўйича учта қисмдан иборат. Айнан томчилаб суғоришда филтраш, ўғитлаш тизимлари автоматлаштирилиб, комптерлаштирилган. Участкага кичик метеостанциялар қўйилиб, улар даланинг ҳолати, намгарчилиги, қачон суғориш кераклиги ҳақидаги хабарни уяли алоқа телефонига ўрнатилган дастурга жўнатади. Суғоришни айнан ана шу телефондаги дастур орқали узоқдан туриб ҳам бошқариш мумкин. Далаларни сувни йўқотишсиз, иқтисод қилган ҳолда мобил дастур орқали бошқариб, суғориш илк маротаба амалга оширилади, — дейди Норин-Қорадарё ирригация тизимлари ҳавза бошқармаси бошлиғининг биринчи ўринбосари Шуҳрат Эргашев.
АҚШда таҳсил олиб, малака оширган агроном Шуҳрат Аброров тренинг қатнашчилари билан дарахтлар ҳосилдорлигини оддий усулда ошириш, қай вақтда шакл бериш, буташ, ҳосилни сақлаб қолиш йўллари борасидаги билимлари билан ўртоқлашди.
Анъанавий усулдан кўра янги технология билан суғоришда 60 фоизгача сув иқтисод қилинади. Мутахассисларнинг фикрига кўра, энг афзал усул томчилатиб суғориш бўлиб, уни бошқариш бўйича киритилаётган янги технология ҳам сувни, ҳам фермернинг вақтини тежайди.
Андижон вилоятида ўтказилган мазкур семинар-тренинг лойиҳа доирасидаги бундай анжуманнинг иккинчиси бўлиб, биринчиси Наманган вилояти боғбонлари учун ўтказилган эди. Жорий йил 2-август кунига қадар янги технологиядан фойдаланиш борасидаги билимлар тренинг шаклида лойиҳага кирган Фарғона, Сирдарё, Қашқадарё ва Сурхондарё вилоятлари ирригация тизимлари сув ҳавзалари вакилларига ҳам етказилади.
Изоҳ (0)