Исроил 17 июль куни БМТ Бош ассамблеясига 2030 йилга қадар Барқарор ривожланиш мақсадлари (БРМ)га бағишланган илк ихтиёрий миллий ҳисоботини тақдим этди. Бу ҳақда «Дарё»га Исроилнинг Ўзбекистондаги элчихонаси матбуот хизмати маълум қилди.
Исроил давлатининг Ўзбекистон Республикасидаги фавқулодда ва мухтор элчиси Эдвард Шапира маълум қилишича, бугунги кунда «Startup Nation» («Стартаплар мамлакати») номи билан танилган Исроил нафақат янги технологиялар ва инновацияларни фаол ривожлантираётган, балки ўз ютуқлари ва тажрибаларини умумий манфаатлар учун баҳам кўришга тайёр турувчи, ижтимоий-иқтисодий жиҳатдан янгича бўлган ўзлигини шакллантирмоқда.
У ерда тадбиркорлар учун турли хил стартаплар дастурлари фаол амалга оширилмоқда; Ногиронлар учун ёрдамчи технологиялар, уларнинг ҳаёт сифатини яхшилашга мўлжалланган ечимлар; Рақамли Исроил Ташаббуси кабилар шулар жумласидандир. МАШАВ (Исроил Ташқи ишлар вазирлиги қошидаги халқаро ҳамкорлик агентлиги) билан биргаликда GCI (Grand Challenges Israel) дастури муваффақиятли амалга оширилмоқда.
Ушбу дастур Жаҳон бўйлаб соғлиқни сақлаш бўйича халқаро ташаббуснинг бир қисми бўлиб, унинг асосий эътибори ривожланаётган давлатлар учун соғлиқни сақлаш, қишлоқ хўжалиги ва сув ресурслари соҳасидаги гуманитар муаммоларга қаратилган.
Ўзбекистонда МАШАВ дипломатик алоқаларни ўрнатишнинг дастлабки кунларидан буён фаол ишламоқда ва сўнгги 28 йил ичида 1600 дан ортиқ ўзбекистонлик мутахассислар Исроилда ва Ўзбекистонда ташкил этилган ўқув курсларида иштирок этган. Мазкур ўқув курслари тиббиёт, қишлоқ хўжалиги тармоғи ва таълим тизимининг турли масалаларига бағишланган. Ўтган йили Исроилда МАШАВ курсларида 75 киши малака оширган. Ўзбекистон агентлик учун устувор аҳамиятга эга бўлган давлат ҳисобланади.
Бундан ташқари, жорий йилнинг баҳор фаслида Бухоро ва Тошкентда агрофорумлар ташкил этилган. Уларга Исроилнинг 15 етакчи компанияси ўз ютуқлари билан ўртоқлашиш ва ўзбекистонлик шериклар билан ишбилармонлик алоқаларини ўрнатиш учун таклиф қилинди. Бир неча компаниялар аллақачон Ўзбекистонда фаол ишламоқда ва томчилатиб суғориш ва иссиқхоналарда деҳқончилик соҳасида лойиҳаларни амалга оширмоқда. Яқинда Ўзбекистон вазирлик ва идоралари вакиллари Жаҳон банки кўмаги билан Исроилга ташриф буюриб, коммунал тизимларни бошқаришнинг самарали ва замонавий моделлари билан танишди.
Шу йилнинг май ойида эса «Eye from Zion» ташкилотининг исроиллик офталмологлари Тошкент ва Самарқанд клиникаларида маслаҳат ва ўнлаб жарроҳлик амалиётларини ўтказди. Ўтган ҳафта Андижон вилоятида истиқомат қилувчи, туғма юрак касаллиги бўлган 3 ёшли Хусан «Volfson» тиббиёт марказида муваффақиятли операция қилинди. Хусаннинг Исроилда яшаши ва операцияси билан боғлиқ бўлган барча харажатларни «Боланинг юрагини қутқаринг» ташкилоти тўлалигича қоплаб берган.
«Боланинг юрагини қутқаринг» хайрия ташкилоти фаолияти Исроилнинг «Ҳеч ким орқада қолдирилмаслиги лозим» тамойилини ҳаётга татбиқ этишининг ва БМТнинг 2030 йилга қадар Барқарор ривожланиш мақсадларини амалга оширилишининг ёрқин намунасидир. Ушбу ташаббуслар асосида Исроилнинг етакчи болалар кардиологлари, офталмологлари ва неонологларининг Ўзбекистонга уюштириладиган иш сафарлари режалаштирилган.
Изоҳ (0)