Европа Иттифоқи афғон аёлларига Ўзбекистон ва Қозоғистон университетларида ўқиш имконини берувчи лойиҳага 2 миллион евро грант ажратди, деб ёзмоқда Repost ЕИ вакиллиги хабарига таяниб.
Унга кўра, Қозоғистон ва Ўзбекистон ўқув юртларида 2025 йилгача қишлоқ хўжалиги, амалий статистика ва тоғ-кончилик соҳасидаги бакалавр, магистратура ҳамда қишлоқ хўжалиги бўйича техник мутахассислик йўналишлари бўйича 50 нафар талаба таълим олади.
Лойиҳа ҳамкори сифатида «БМТ-аёллар» тузилмаси тадбиркорлик ва тармоқ кўникмаларини ўргатиш мақсадида ёзги мактаблар ҳам ташкиллаштиради. Бу эса иштирокчиларнинг келажакда иш билан таъминланиши ва шу орқали уларнинг иқтисодий ҳуқуқ ва имкониятларининг кенгайишига ёрдам беради.
Ушбу ташаббус аёлларнинг ишбилармонлик фаолияти ва уларнинг бандлигини таъминлашда, шунингдек Афғонистонда ўз жамоаларини шакллантиришда янги имкониятлар яратиши кутилмоқда.
БМТ Тараққиёт дастурининг 2018 йилги инсоният тараққиёти тўғрисидаги ҳисоботига кўра, Афғонистондаги барча катта ёшдаги аёлларнинг 11 фоизи ўрта маълумот олган ва уларнинг 19,5 фоизи ишга жойлашган холос. Афғон эркаклари орасида эса бу кўрсаткич тегишли равишда 37 ва 87 фоизни ташкил этади. 2016—2017 йилларда Афғонистон аҳолисининг ярмидан кўпи қашшоқликда яшаган.
Изоҳ (0)