Республика Маънавият ва маърифат маркази ходимлари Туркияда бўлиб қайтишди

Республика Маънавият ва маърифат маркази ташаббуси билан Қашқадарё вилояти ҳокимлиги ҳамкорлигида Туркия давлатининг «Анқара» университетида марказнинг масъул ходимлари иштирокида буюк олим Абу Муин Насафий ҳаёти ва меросига бағишланган тадбирлар ўтказилди, бу ҳақда Республика Маънавият ва маърифат маркази ахборот хизмати «Дарё»га маълум қилди.

Учрашув давомида икки давлат олимлари келгусидаги ўзаро илмий ҳамкорликни янада мустаҳкамлаш, буюк мутафаккир меросининг бугунги кундаги аҳамиятини ёритиб бориш юзасидан ўзаро фикр алмашди.

Тадбир доирасида алломанинг «Тафсират ал-адилла» асарининг ўзбек тилидаги таржима нашрининг тақдимоти бўлиб ўтди ҳамда учрашув сўнгида университетнинг қўлёзмалар фонди билан танишилди. Республика Маънавият ва маърифат маркази бўлим бошлиғи Эргаш Даминов ўз фикрлари қуйидагича билдириб ўтди: «Мавжуд манбалар рақамлаштирилган, электрон базаси, қўлёзмалардан фойдаланишнинг барча имкониятлари яратилган. Энг қувонарлиси аждодларимиз, хусусан, Имом Мотрудий ва Абу Муин Насафий асарлари, уларга бағишлаб қилинган тадқиқотлар алоҳида бўлимда сақланмоқда».

Туркия сафарининг сўнгги кунида юртдошлар Анқара шаҳридаги Ислом тадқиқотлар маркази кутубхонасида (ИСАМ) бўлиб, Абу Муин Насафийнинг асарлари билан танишди, мавжуд қўлёзмалардан нусха олиш, харид қилиш юзасидан музокаралар олиб борди.