Ўзбекистон Бош прокуратураси Академияси магистратурасига ҳужжатлар қабули давом этмоқда

Ўзбекистон Бош прокуратураси Академияси 2019/2020 ўқув йилидан бошлаб магистратурага абитуриентларни қабул қилади. Хабар беришларича, магистратурага танлов «юриспруденция» мутахассислиги бўйича олий юридик маълумотга эга бўлган шахслар орасида ўтказилади. Шунингдек, прокуратура органлари ходимлари, шу жумладан амалдаги кадрлар захирасидаги ходимлар танловда иштирок этиши мумкин.

Академия магистратурасининг «коррупцияга қарши курашиш», «прокурорлик фаолияти» ва «тергов фаолияти» йўналишлари бўйича 2019/2020 ўқув йилига жами 30 та, шу жумладан 18 та давлат гранти ва 12 та тўлов контракти асосида қабул квотаси тасдиқланган бўлиб, шундан:

• прокуратура органлари ходимлари учун — 15 та (ҳар бир йўналиш бўйича 5 тадан);
• очиқ танлов бўйича — 15 та, шу жумладан давлат гранти асосида 3 та (ҳар бир йўналишда 1 тадан) ва тўлов контракти асосида 12 та.

Очиқ танлов бўйича давлат гранти асосида қабул қилинган номзодларга ҳар ойлик стипендия тўланади. Кириш имтиҳонлари 20 август—10 сентябрь оралиғида, мутахассислик фанлари ва чет тили фанидан ёзма имтиҳон, шунингдек суҳбат тарзида ўтказилади.

Мутахассислик фанлари бўйича ёзма имтиҳон ва суҳбат жиноят ҳуқуқи, жиноят-процессуал ҳуқуқи, конституциявий ҳуқуқ, давлат ва ҳуқуқ назарияси, ҳуқуқни муҳофаза қилувчи органлар фанларидан казуслар ва саволлар ҳамда ҳуқуқ фанларидан эсседан иборат бўлади.

Чет тилини билиш даражасини тасдиқловчи B2 ва ундан юқори даражадаги давлат малака сертификатига ёки халқаро сертификатлардан CEFR (Common European Framework of Reference) бўйича B2, IELTS (International English Language Testing System) бўйича 5,5 балл, TOEFL (Test of English as a Foreign Language) бўйича 72 баллдан кам бўлмаган баллга эга номзодлар чет тили фани бўйича имтиҳонни топширишдан озод қилинади. Уларга энг юқори балл (50 балл) қўшилади.

Академия магистратурасида ўқиш давомийлиги — 1 йил. Ўқиш жараёнида ижобий натижаларга эришган Академия магистратураси битирувчилари прокуратура органларига хизматга қабул қилишга тавсия қилинади. Академия магистрлари Академия докторантурасида ёки мустақил изланувчи сифатида илмий-тадқиқот фаолияти билан шуғулланиб, олий ўқув юртидан кейинги таълим олиш имкониятига эга бўлади.

Магистратурага номзодлар 10 августгача доимий ёки вақтинча яшаш манзили бўйича Академия қабул комиссияси аъзолари — прокуратура органларининг кадрлар тармоқларига ҳужжат топшириши мумкин. Қўшимча маълумотларни (71) 202-04-96 (1775) телефон рақами орқали олиш мумкин.