Июль ойининг ўтган даврида Самарқанд вилоятида жами 3 нафар фуқаро чўмилиш белгиланмаган жойларда эҳтиётсизлиги оқибатида сувда чўкиб кетган. Жумладан, 5 июль куни Иштихон тумани «Тойтуёқ» маҳалласида яшаган З.Ф. Оқдарё дарёсига, 7 июль куни Нарпай тумани «Турон» маҳалласида яшаган Х.К. Зарафшон дарёсига ва 11 июль куни Каттақўрғон тумани «Дўстлик» маҳалласида яшаган К.Х. Оқдарё дарёсига эҳтиётсизлиги оқибатида чўкиб кетган. Чўмилиш мавсуми бошлангандан буён 11 маротаба чўкиш билан боғлиқ бахтсиз ҳодиса рўй берган. Бу ҳақда «Дарё»га Самарқанд вилояти Фавқулодда вазиятлар бошқармаси маълум қилди.
Фуқароларнинг белгиланмаган ва тақиқланган жойларда чўмилишининг олдини олиш мақсадида Самарқанд вилоят Фавқулодда вазиятлар бошқармаси вилоят ҳудудидаги очиқ сув ҳавзалари атрофидаги маҳаллаларда аҳоли ўртасида тушунтириш-тарғибот ишлари олиб бормоқда. Хусусан, шу йил мавсум бошидан буён вилоятда шу мавзуда жами 17 та семинар ўтказилиб, аҳоли ўртасида 517 маротаба суҳбат ташкил этилган. Уларда жами 12 714 нафар фуқаро қамраб олинган.
Бундан ташқари, Зарафшон, Қорадарё, Оқдарё дарёлари, Дарғом, Шаҳоб, Туятортар, Нарпай каналлари, Каттақўрғон, Оқдарё ва Тўсинсой сув омборлари, Янгиариқ ва Оҳалик ариқларида назорат-рейд тадбирлари ўтказилиб, хавфли жойларга 500 тадан ортиқ «Чўмилиш тақиқланади» белгилари ўрнатилган. Бозорлар, истироҳат боғлари ҳамда аҳоли гавжум тўпланадиган объектларда рухсат этилмаган жойларга чўмилмасликни тарғиб этувчи 300 га яқин баннер ўрнатилди.
Самарқанд вилояти Фавқулотда вазиятлар бошқармаси чўмилишдаги кўнгилсизликларнинг олдини олиш мақсадида фуқаролардан ёзнинг жазирама иссиқ кунларида эҳтиёткорликни янада ошириш, фақатгина белгиланган сув ҳавзаларида чўмилиш, чўмилиш рухсат этилмаган сув ҳавзаларида чўмилмаслик, сув ҳавзалари атрофида ўрнатилган белгиларига риоя этиш ва ёш, вояга етмаган болаларни ота-оналарнинг назоратисиз қолдирилмаслик лозимлигини билдирган.
Изоҳ (0)