Тахиатош иссиқлик электр станциясида 18 июль куни юз берган фавқулодда вазият туфайли ИЭСнинг икки энергия блоки тўхтатилди, деб хабар қилмоқда Sputnik.
«Бугун соат 10:43 да Тахиатош ИЭСининг бириничи энергоблокида техник ҳимоя ишлаб кетиши натижасида тўхтатилди. 12 сониядан сўнг иккинчи энергоблокда ва турбогенераторлардан бирида ҳам ҳимоя тизими ишлаб кетди», — дейилган вазирлик хабарида.
Ҳозирги вақтда ушбу ҳолатнинг сабаблари ўрганилмоқда. Энергия блокларини ишга тушириш имконияти қидирилмоқда.
Хабарда айтилишига кўра, ИЭС тўхташи оқибатида Хоразм вилоятининг бир неча туманларида ва Қорақалпоғистонда энергия таъминот тизими узилган.
Эслатиб ўтамиз, Тахиатош ИЭСининг қуввати 730 МВт электр станцияси таркибида 3 та энергоблок ва учта турбогенератор ишлайди. ИЭС Ўзбекистон ғарбини электр токи билан таъминлайди.
Ушбу ИЭСни замонавийлаштириш бўйича ўтказилган тендерни 2016 йилда Жанубий Кореянинг Hyundai Engineering компанияси ютиб чиққанди. Умумий қиймати 700 миллион доллар бўлган реконструкция ишлари 2021 йилгача мўлжалланган.
Изоҳ (0)