Элмира Боситхонова бир вақтнинг ўзида ҳам Ўзбекистон хотин-қизлар қўмитаси раиси, ҳам Бош вазир ўринбосари сифатида иккита лавозимда ишлашига изоҳ берди. У бу ҳақда журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
«Халқаро ташкилот вакиллари Ўзбекистонга келганида, ‘Ўзбекистон Хотин-қизлар қўмитаси раиси нима учун ҳам Бош вазир ўринбосари, ҳам қўмита раиси’, деган саволни беришганда менинг жавобим қуйидагича бўларди: битта аёлнинг муаммосини ечиш мақсадида вазирликлар, жамоат ташкилотларини сафарабар қилиш учун мен дарров Бош вазир ўринбосари бўлиб қоламан. Қайсидир бир идорага, жамоат ташкилотига кириб бориш керак бўлса, унда давлат идорасининг ваколати бўлмаган жойларда мен дарров жамоат ташкилоти раҳбари бўлиб қоламан. Битта аёлни қўллаб-қувватлаш учун бу иккита тиргак жуда ҳам муҳим. Акс ҳолда Бош вазир ўринбосари бажариши мумкин бўлган нарсани жамоат ташкилотининг раҳбари қилолмайди. Жамоат ташкилотининг раҳбари қадам босадиган жойга Бош вазир ўринбосари кира олмаслиги мумкин», — деди Элмира Боситхонова.
Маълумот учун, Ўзбекистон Президентининг «Ўзбекистон Республикаси Ҳукумати ишини ташкил этишнинг сифат жиҳатидан янги тизимини жорий этиш тўғрисида»ги қарорига мавофиқ Ўзбекистон Хотин-қизлар қўмитаси раиси бир вақтнинг ўзида Ўзбекистон Бош вазири ўринбосари ҳисобланади.
Элмира Боситхонова 2019 йилнинг июнь ойида Ўзбекистон Хотин-қизлар қўмитаси раислиги ва Бош вазир ўринбосари лавозимига тайиланган. Бунгача Боситхонова 2016 йилнинг 12 декабридан буён Соғлиқни сақлаш вазири ўринбосари лавозимида ишлаб келаётганди. У 2011—2016 йилларда ҳам Хотин-қизлар қўмитасига раҳбарлик қилган. Боситхонова ушбу лавозимда ишалб келган Танзила Норбоева ўрнини эгаллаган, Норбоева эса Олий Мажлис Сенати раиси этиб сайланган.
Изоҳ (0)