Тожикистонлик фуқаро Эрон авиакомпаниясини 1 млн долларга «чув туширди»

Тожикистонда Р.Ҳайдаров исмли шахсга нисбатан суд ҳукми ўқилди. «Asia-Plus» хабарига кўра, у фирибгарлик ва чет эл валютасида ноқонуний операцияларни амалга оширганликда айбланиб, 13 йилга озодликдан маҳрум этилди.

Маълум бўлишича, у жиноятни Соғд вилоятининг Бўстон шаҳридаги «Аджам-Авиа» компаниясига раҳбарлик қилган пайтида амалга оширган.

Хабарда айтилишича, Ҳайдаров Эроннинг Taban Airlines авиакомпаниясининг масъул вакиллари ишончига кириб, улардан қарийб 1 миллион долларни ўзлаштирган.

Бу пуллар эвазига Taban Airlines авиакомпаниясига Боинг 757-200 самолёти двигателини етказиб бериш мажбуриятини олган, аммо уни бажармаган. Шунингдек, Ҳайдаров ўзининг бу ҳаракати билан Тожикистоннинг «Нахустлизинг» компаниясига ҳам зарар етказган.

Унга нисбатан Тожикистон Жиноят кодексининг 247 (фирибгарлик) ва 286-моддалари (чет эл валютасида ноқонуний операцияларни амалга ошириш) билан жиноят иши қўзғатилган ва суд қарори билан 13 йилга озодликдан маҳрум этилган.

Бундан ташқари, Taban Airlines компанияси фойдасига Ҳайдаровнинг 16 минг долларлик BMW машинаси мусодара қилинган ва 987,5 минг доллар ундирилган.