Ўзбекистон Энергетика вазирининг биринчи ўринбосари, «Ўзатом» бош директори Жўрабек Мирзамаҳмудов Ўзбекистонда атом электр станцияси қурилиши қандай истиқболларга йўл очиши ҳақида гапириб берди, деб хабар берди «Дарё» мухбири Севара Нишонова.
«Ўзбекистонда биринчи атом электр станциясини қуриш учун муҳандислик-қидирув ишларининг иккинчи босқичи бошланди. Ушбу ҳудуд кўзда тутилган барча ҳудудларда ўтказилган бир йиллик тадқиқот натижалари асосида танланди. У бундай объектларни қуриш учун талаб этиладиган бир қатор мезонларга жавоб беради.
Аввало, АЭС Ўзбекистонга барқарор электр энергияси ишлаб чиқариш имконини беради. Иккита энергия блокларини қуриш натижасида йилига 18-18,5 миллиард кВт/соат электр энергияси ишлаб чиқарилади. Бу шунингдек, янги иш ўринларини яратишдир. Қурилиш ишларига 8 мингдан ортиқ қурувчилар ҳамда бошқа тегишли тармоқлар, хизматлар, транспортлар жалб этилади. Қурилиш ниҳоясига етгач, 2,5 мингдан ортиқ иш ўрни яратилади ва асосан мазкур туман аҳолиси иш билан таъминланади.
Ҳудуд инфраструктурасини ривожлантиришга ҳисса қўшадиган атомчилар шаҳарчасини барпо этиш ҳам кўзда тутилган», - дейди Мирзамаҳмудов.
Изоҳ (0)