Жиноят ишлари бўйича Самарқанд вилоят судида пора билан қўлга тушган Самарқанд вилоят Адвокатлар палатаси раҳбари Отабек Ахтамов жиноий ҳаракатлари юзасидан суд иши бўлиб ўтди. Бу ҳақда «Дарё» мухбири хабар бермоқда.
Самарқанд шаҳридаги «Қомус» адвокатлар ҳайъати бошқарувчиси ҳамда Адвокатлар палатаси Самарқанд вилоят ҳудудий бошқармаси бошлиғи вазифаларида ишлаб келган Отабек Ахтамов 2017 йилнинг 13 июль куни Самарқанд вилоят прокуратураси томонидан Б.А. ва бошқаларга нисбатан қўзғатилган жиноят ишида айбланувчи Б.А.нинг ҳуқуқ ва қонуний манфаатларини ҳимоя қилиш учун «Қомус» адвокатлар ҳайъатининг 2017 йил 13 июлдаги 957-сонли ордерини тақдим қилган.
Мазкур жиноят иши бўйича олиб борилаётган тергов ҳаракатларида айбланувчи Б.А.нинг ҳимоячиси сифатида иштирок этиб келган Отабек Ахтамов Б.А.нинг турмуш ўртоғи Н.А.нинг ишончига кириб, унга турмуш ўртоғига 2017 йилнинг 14 июль куни танланган қамоққа олиш тарзидаги эҳтиёт чорасини гаров эҳтиёт чорасига ўзгартириб беришни ваъда қилган. Бунинг эвазига банк муассасасига 220 миллион сўм миқдоридаги пул маблағини 3 кун ичида топшириш кераклигини, акс ҳолда Б.А.га нисбатан танланган қамоққа олиш тарзидаги эҳтиёт чораси ўзгаришсиз қолиб кетишини айтган.
2017 йилнинг 15 июль куни ўзининг Пастдарғом тумани «Найман» маҳалласида жойлашган уйида Н.А.дан 17 500 доллар, 18 июль куни Самарқанд шаҳар «Қомус» адвокатлар ҳайъати биносида 10 000 доллар, жами 27 500 доллар миқдоридаги пул маблағларини фирибгарлик йўли билан қўлга киритиб, ўзининг эҳтиёжлари учун сарфлаб юборган.
Шунингдек, Отабек Ахтамов хизмат мавқеидан фойдаланиб, вилоят прокуратураси томонидан ТИФ «Миллий банк» Самарқанд вилоят бўлими мансабдор шахсларига нисбатан қўзғатилиб, тергов ҳаракатлари ўтказилаётган жиноят иши юзасидан фуқаро Ф.Б.нинг ҳуқуқ ва қонуний манфаатларини ҳимоя қилиш учун «Қомус» адвокатлар ҳайъатининг 2018 йил 22 июлда 2029-сонли ордерини тақдим қилган. Мазкур жиноят иши бўйича олиб борилаётган тергов ҳаракатларида Ф.Б.нинг ҳимоячиси сифатида иштирок этиб, 2018 йилнинг 3 сентябрида жабрланувчи Н.К.дан унинг синглиси – айбланувчи Ф.Б.га оид жиноят иши юзасидан дастлабки тергов давомида енгиллик қилиб бериш, қопланмаган зарарни йўқ қилиб беришни ваъда қилган. Н.К.га вилоят прокуратураси мансабдор шахслари орқали иш юзасидан тайинланган судга оид хатшунослик экспертиза хулосасини Ф.Б.нинг фойдасига ижобий ҳал қилиб беришини айтган.
2018 йилнинг 4 сентябрь куни соат тахминан 14:35 атрофида ўтказилган тезкор тадбирда, Отабек Ахтамов Адвокатлар палатаси Самарқанд вилоят ҳудудий бошқармаси биносининг мажлислар хонасида Н.К.дан жуда кўп миқдордаги келишилган 20 000 доллардан 11 900 долларини фирибгарлик йўли билан олаётган вақтда ашёвий далиллар билан ушланган.
Шунингдек, Отабек Ахтамов фирибгарлик, яъни алдаш ёки ишончини суиистеъмол қилиш йўли билан ўзганинг мулкини қўлга киритиш мақсадида, жабрланувчи Людмила Кимнинг ишончига кириб, уни алдаб, у билан бирга Ургут туманида савдо мажмуаси қуриб, олинган фойдадан улуш беришни ваъда қилиб, дастлаб 2014 йил 24 сентябрда таниши – адвокат Баҳодир Жуманов орқали жабрланувчи Л.К.нинг Самарқанд шаҳар «Тараққиёт» кўчасида жойлашган уйидан 20 000 долларни, шунингдек, дастлабки тергов давомида шахсини аниқлаш имкони бўлмаган шахсларни Л.К.нинг уйига юбориб, ундан 2014 йилнинг 26 сентябрдан 2018 йилнинг июнь ойи оралиғида 137 400 долларни фирибгарлик йўли билан қўлга киритиб, ўз эҳтиёжлари учун сарфлаб юборган.
Жиноят ишлари бўйича Самарқанд вилоят суди судьяси Б.Алиқуловнинг маълум қилишича, Отабек Ахтамов Ўзбекистон Республикаси Жиноят Кодексининг 168-моддаси 4-қисми «а» банди (Жуда кўп миқдорда фирибгарлик), 25,168-моддаси 4-қисми «а» банди ва 28,211-моддаси 3-қисми «а» бандида (Жуда кўп миқдорда) назарда тутилган жиноятларни содир этганликда айбли деб топилиб, 3 йил муддатга муайян ҳуқуқдан, яъни адвокатлик фаолияти билан шуғулланиш ҳуқуқидан маҳрум қилиниб, энг кам ойлик иш ҳақининг 300 баравари миқдорида жарима ва 12 йил 6 ой муддатга озодликдан маҳрум қилиш жазоси тайинланган.
Изоҳ (0)