2019–2020 йилларда Андижонда инвестиция маблағлари ҳисобига учта замонавий Муз саройи қуриб битказилиб фойдаланишга топширилади. Бу ҳақда вилоят ҳокимлигига таяниб «Дарё» мухбири хабар бермоқда.
Давлат раҳбари илгари сурган беш муҳим ташаббус ижросини таъминлаш, аҳоли ўртасида соғлом турмуш тарзини тарғиб қилиш, шунингдек қишки спорт турларини оммавийлаштиришни кўзлаб Андижон шаҳрининг Иқбол маҳалласида биринчи муз саройини қуриш ишлари бошлаб юборилди.
Яна иккита ана шундай спорт иншоотлари эса хорижлик инвесторлар томонидан Андижон шаҳрининг Боғишамол даҳаси ҳамда Эски шаҳар ҳудудида қурилиши бошланади.
«Gold Team-01» қўшма корхонаси қурувчилари томонидан барпо қилинаётган ушбу мажмуанинг умумий қиймати 1 миллион АҚШ долларини ташкил қилади. Йил охирида фойдаланишга топширилиши кўзда тутилаётган спорт аренаси ҳам замонавий, ҳам миллий меъморчилик санъати ва илғор технологиялар анъаналарини мужассам этган ҳолда қад ростлайди.
Мажмуада умумий овқатланиш майдончаси, спорт ва озиқ-овқат маҳсулотлари дўконлари фаолияти ҳам йўлга қўйилади. Натижада бир вақтнинг ўзида 200 нафар мижозга хизмат кўрсатиш имконияти пайдо бўлади.
Изоҳ (0)