2019–2020-yillarda Andijonda investitsiya mablag‘lari hisobiga uchta zamonaviy Muz saroyi qurib bitkazilib foydalanishga topshiriladi. Bu haqda viloyat hokimligiga tayanib “Daryo” muxbiri xabar bermoqda.
Davlat rahbari ilgari surgan besh muhim tashabbus ijrosini ta’minlash, aholi o‘rtasida sog‘lom turmush tarzini targ‘ib qilish, shuningdek qishki sport turlarini ommaviylashtirishni ko‘zlab Andijon shahrining Iqbol mahallasida birinchi muz saroyini qurish ishlari boshlab yuborildi.
Yana ikkita ana shunday sport inshootlari esa xorijlik investorlar tomonidan Andijon shahrining Bog‘ishamol dahasi hamda Eski shahar hududida qurilishi boshlanadi.
“Gold Team-01” qo‘shma korxonasi quruvchilari tomonidan barpo qilinayotgan ushbu majmuaning umumiy qiymati 1 million AQSh dollarini tashkil qiladi. Yil oxirida foydalanishga topshirilishi ko‘zda tutilayotgan sport arenasi ham zamonaviy, ham milliy me’morchilik san’ati va ilg‘or texnologiyalar an’analarini mujassam etgan holda qad rostlaydi.
Majmuada umumiy ovqatlanish maydonchasi, sport va oziq-ovqat mahsulotlari do‘konlari faoliyati ham yo‘lga qo‘yiladi. Natijada bir vaqtning o‘zida 200 nafar mijozga xizmat ko‘rsatish imkoniyati paydo bo‘ladi.
Izoh (0)