Қозоғистон энергетика вазири Қанат Бозумбаев мамлакатда атом электр станцияси қурилиши борасидаги саволларга жавоб берди.
«Аҳоли фикрини инобатга олиш нима дегани? Бу ижтимоий сўров ёки референдум. Шу сабабли хавотирга тушманг, агар АЭС қуриладиган бўлса, сиз аниқ биласиз ва эшитасиз. Аҳоли ўз фикрини билдириши керак. Агар аҳоли йўқ деса, у ҳолда ҳеч ким ҳеч нарса қурмайди. Фақат халқ фикри инобатга олинади. Бугунги кунда ҳукумат даражасида атом электр станцияси қурилиши борасида бирор бир қарор йўқ», — деди вазир.
Россия президенти Владимир Путин 3 апрель куни Кремлда Қозоғистон президенти Қосим-Жўмарт Тўқаев билан учрашув чоғида Қозоғистонда Россия технологияси асосида АЭС қурилиши эҳтимоли ҳақида маълум қилган эди.
Эртаси куни Қозоғистон энергетика вазирининг ўринбосари Магзум Мирзагалиев АЭС қурилиши ҳақида қарор қабул қилинмаганини маълум қилди. Бироқ Қозоғистон ҳукумати Россия иштирокида АЭС қуриш учун Шарқий Қозоғистон вилоятидаги Курчатов шаҳри ва Олмаота вилоятидаги Улкен қишлоғини асосий майдонча сифатида кўрмоқда.
Изоҳ (0)