Жиноят ишлари бўйича Уйчи туман суди томонидан тумандаги жоме масжидида велосипедларни ўғирлаб, сотиб юборган шахсга жазо тайинланди. Бу ҳақда «Дарё»га суд раиси Жамшид Маъмуров маълум қилди.
Учқўрғонлик 53 яшар Мурод Соипов (исм-шарифлар ўзгартирилган) жорий йил январь ойи бошларида «Худойберди эшон» жоме масжидида намоз ўқилаётганидан фойдаланиб, Шерзод Мўминовнинг Германияда ишлаб чиқарилган, нархи 1,5 миллион сўмлик велосипедини миниб кетади. Кейинчалик велосипедни Учқўрғон бозорига олиб бориб, 400 минг сўмга сотиб юборади.
Соипов 7 февраль ва 15 март кунлари такроран ўғирликка қўл уради. Бу гал мазкур масжиддан Ҳабиб Ғуломов ва Асқар Маматовга тегишли велосипедларини уйига олиб кетади. Шундан сўнг масжиддагилар ва велосипед эгалари ўғирлик ҳолати юзасидан ички ишлар идоасига мурожаат қилади.
Олиб борилган суриштирув ва қидирув ишлари натижасида Мурод Соипов қўлга олинди. У Жиноят кодексининг 169-моддаси 3-қисми «а» банди билан жиноий жавобгарликка тортилди.
Жиноят ишлари бўйича Уйчи туман судида ушбу жиноят иши кўриб чиқилди. Судда М.Соипов содир этган ўғирлик ҳаракатлари ошкор бўлгач фарзандларининг турмушида нотинчлик келиб чиққани, шунинг ўзи унга етарли жазо бўлганини билдирди. Келтирилган зарарни тўла бартараф этганлиги ҳамда қилмишидан пушаймонлигини эътиборга олиш, қонун доирасида енгиллик берилишини сўради.
Суд М.Соиповга нисбатан 5 йил озодликдан маҳрум қилиш жазосини тайинлади. Жабрланувчилар судланувчини кечиргани, маҳалла кафиллик бергани инобатга олиниб, М.Соиповга нисбатан шартли ҳукм қўлланди. У тайинланган озодликдан маҳрум қилиш жазосини ўташдан шартли равишда озод қилиниб, 2 йиллик синов муддати белгиланди.
Изоҳ (0)