Саид-Абдулазиз Юсуповга нисбатан у раҳбарлик қилган Ўзбекистон босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фондининг 270 миллион сўм пул маблағларини ўзлаштириш айби илгари сурилмоқда. Бу ҳақда 17 июнь куни Ахборот ва оммавий коммуникациялар агентлигида ўтган журналистлар билан мулоқотда Ўзбекистон бош прокурори ўринбосари Эркин Йўлдошев маълум қилди.

Фото: Ахборот ва оммавий коммуникациялар агентлиги

Саид-Абдулазиз Юсупов 10 май куни Жиноят кодексининг 168-моддаси 4-қисми «а» бандида назарда тутилган жиноятни (жуда кўп миқдорда фирибгарлик) содир этганликда гумон қилиниб ушланган ва ДХХ тергов ҳибсхонасига жойлаштирилган эди. 12 май куни ДХХ Тергов бошқармаси томонидан у жиноят ишида айбланувчи тариқасида иштирок этишга жалб қилиниб, унга нисбатан қамоқ тарзидаги эҳтиёт чораси қўлланилган.

Бош прокурор ўринбосари Эркин Йўлдошевнинг маълум қилишича, Саид-Абдулазиз Юсупов фирибгарлик йўли билан ўзлаштирган пулини қайтариш мақсадида ўз мансабини суиистеъмол қилиб, фонднинг кўп миқдордаги маблағини талон-тарож қилган.

Бу жиноят ишига бўлган қизиқишни ҳисобга олиб, янги тафсилотлардан бирини айтмоқчиман. Юсупов Жиноят ишлари бўйича Мирзо Улуғбек туман судининг 2018 йил 26 августдаги ҳукмига кўра, 2014 йилнинг июнь ойида фуқаро Канязовага ўзини Миллий хавфсизлик хизмати (ҳозирги Давлат хавфсизлик хизмати — таҳр.) ходимиман, деб таништириб, унга Туркиядан тиббиёт жиҳозларини етказиб беришини айтиб, 240 миллион сўм пулини фирибгарлик йўли билан қўлга киритганлиги учун судланган. Ҳозирги тергов жараёнида мана шу ҳолат билан боғлиқ янги тафсилотлар аниқланди.

Юсупов ушбу жиноят бўйича етказилган 240 миллион сўм зарарни қоплаш учун, мансабини суиистеъмол қилиб, ўзи раҳбарлик қилиб турган Ўзбекистон босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фондига аниқ мақсадлар учун ва оммавий ахборот воситалари соҳаси ходимларини қўллаб-қувватлаш учун ажратилган 270 миллион сўм пул маблағларини ўзлаштириш йўли билан талон-тарож қилиб, шу маблағларни турли хўжалик юритувчи субъектларга ўтказиш орқали, судланаётган иш бўйича зарарни қоплашга йўналтирган.

Ҳозирда фонднинг молиявий фаолияти бўйича тафтиш ўтказилмоқда.

Эркин Йўлдошев, бош прокурор ўринбосари

Аввалроқ Саид-Абдулазиз Юсупов тергов давомида қийноққа солингани ҳақидаги хабарлар Бош прокуратура томонидан рад этилган эди.