Олий Мажлис Сенати раиси Ниғматилла Йўлдошев порахўрлик иллати жамиятнинг «бош оғриғи» бўлиб келганини таъкидлади. У бу ҳақда 15 июнь куни Коррупцияга қарши курашиш бўйича республика идоралараро комиссиясининг кенгайтирилган мажлисида айтиб ўтди, дея хабар бермоқда «Дарё» мухбири Мусулмонбек Иброҳимов.
Кенгайтирилган мажлисда Президент Шавкат Мирзиёевнинг 2019 йил 27 майдаги «Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида»ги фармонида белгилаб берилган вазифалар муҳокама қилинди.
Олий Мажлиси Сенати раиси, Коррупцияга қарши курашиш бўйича республика идоралараро комиссиясининг раиси Ниғматилла Йўлдошев коррупция кўп йиллардан буён мавжудлиги ва у жамиятнинг «бош оғриғи» бўлиб келгани ҳақида айтиб ўтди.
«Энг хатарли жиҳат шундаки, коррупциянинг илдизлари жуда олис тарихга бориб тақалади ва у айрим тоифадаги одамлар, айниқса, давлат хизматидаги баъзи мансабдорлар ва масъулларнинг қон-қонига сингиб кетган том маънодаги касалликдир. Биргина мисол: муқаддас динимизнинг ‘Пора олган ҳам, уни берган ҳам дўзахийдир’, деган қатъий ҳукми барча замонлар учун бу иллат жамиятнинг ‘бош оғриғи’ бўлиб келганидан далолатдир», — деди Ниғматилла Йўлдошев.
Олий Мажлис Сенати раисинин қўшимча қилишича, жамиятни бу касалликдан батамом халос этишнинг ҳамма учун бирдек мақбул воситаси ҳалигача ўйлаб топилмаган.
Маълум қилинишича, 2018 йилда пора билан боғлиғлиқ оғир жиноятни содир этган 2 минг нафарга яқин мансабдор шахс жиноий жавобгарликка тортилган.
Изоҳ (0)