Термизда 14 июнь куни Давлат хавфсизлик хизмати вилоят бошқармаси ва Давлат чегара қўшинлари ҳарбий хизматчиларига ҳар бири беш қаватли, 30 хонадонли, уч ва тўрт хонадан иборат 3 та уй фойдаланишга берилди. Бу ҳақда Сурхондарё вилояти ҳокимлиги матбуот хизмати хабар берди.
Сурхондарё вилояти ҳокими, ҳарбий-маъмурий сектор раҳбари Тўра Боболов, Давлат хавфсизлик хизмати вилоят бошқармаси бошлиғи, полковник Абдуғофур Аҳмедов ҳарбий хизматчиларга хонадон калитларини тантанали равишда топширди.
«Замонавий лойиҳалар асосида қурилган уйлар шинам. Уларда барча қулайликлар яратилган. Яна энг муҳим жиҳати, уйлар қийматининг 25 фоизи давлат томонидан бошланғич бадал сифатида тўлаб берилган. Қолаверса, мазкур квартира бизга узоқ муддатга, йиллик 7 фоизли ипотека кредити асосида берилгани биз учун катта ғамхўрликдир», — дейди катта лейтенант Саидаҳмад Қурбонов.
Қурилиш ишларида фаол қатнашган бир гуруҳ қурувчиларга ҳам эсдалик совғалар топширилган.
Изоҳ (0)