Ўзбекистон Бош прокуратураси Давлат хавфсизлик хизмати (ДХХ)нинг собиқ раиси Ихтиёр Абдуллаевга нисбатан жиноят иши қўзғатилганини расман тасдиқлади (аввалроқ, 2019 йил май ойида Абдуллаевнинг «порахўрлик ботқоғига ботгани» ҳақида мақолалар эълон қилинган эди).
Хабар беришларича, жиноят иши бўйича ДХХнинг собиқ биринчи ўринбосари Жаҳонгир Эгамов, аввал қўлга олинган Ўзбекистон Олий суди раиси ўринбосари — маъмурий ишлар бўйичат судлов ҳайъати раиси Баҳодир Деҳқонов ва бошқалар — жами 10 га яқин одам тергов қилинмоқда.
«Мансаб ваколатларини суиистеъмол қилиш, порахўрлик билан боғлиқ содир этилган жиноятлар юзасидан Давлат хавфсизлик хизматининг собиқ раҳбарлари Ихтиёр Абдуллаев, Жаҳонгир Эгамов ва бошқа 10 га яқин мансабдорларга нисбатан жиноят иши қўзғатилган. Ҳозирги вақтда тергов ҳаракатлари олиб борилмоқда. Мансабдорлар орасида Баҳодир Деҳқонов ҳам бор», — дея бош прокурор ўринбосари Эркин Йўлдошевнинг сўзларидан иқтибос келтирмоқда «Газета.uz».
Исмлари келтирилган шахсларга нисбатан содир этган жиноятларидан келиб чиқиб, эҳтиёт чоралари кўрилган.
Маълумот учун, 2018 йил январида ДХХ (МХХ) раҳбари этиб тайинланган (ушбу лавозимда хизматга 1995 йилдан бери раҳбарлик қилган Рустам Иноятовни алмаштирган эди), 2019 йил февралида эса ўз хоҳишига ДХХ раислигидан кетган эди.
Унинг лавозимдан озод қилиниши саломатлиги билан боғлиқ, деб айтилган эди. Хусусан, кейинги бир йил давомида бўйин ва бел умуртқа поғонасида икки марта оғир жарроҳлик амалиётини ўтказгани, шунингдек, кўзи ҳам операция қилингани таъкидланган эди.
Ихтиёр Абдуллаев 2015 йилдан 2018 йилга қадар Ўзбекистон бош прокурори, 2009 йилдан 2015 йилга қадар эса Президент давлат маслаҳатчиси сифатида ишлаган.
Баҳодир Деҳқонов 2017 йил май ойидан бери Олий суд раиси ўринбосари — маъмурий ишлар бўйича судлов ҳайъати раиси лавозимида ишлаб келаётган эди. Бунгача у Олий хўжалик суди раиси ўринбосари сифатида фаолият олиб борган. 2019 йил февралида у хизмат хонасида қўлга олингани хабар қилинган эди.
Изоҳ (0)