Қашқадарё вилоятида 2018–2019 йилларда аҳолининг бандлигини таъминлаш ва оилавий тадбиркорликни ривожлантириш учун 32 362 та лойиҳага 600,7 миллиард сўм кредит берилган. Бу ҳақда 12 июнь куни бўлиб ўтган «Тадбиркорлик фаолиятини қўллаб-қувватлаш ва ҳимоя қилиш масалаларида амалга оширилган ишлар сарҳисоби» мавзусидаги матбуот анжуманида маълум қилинди, дея хабар беради «Дарё» мухбири.
Вилоят марказий банки бош бошқармаси бошлиғи Файзулла Ражабовнинг маълумот беришича, ўтган 2 йил давомида «Ҳар бир оила — тадбиркор» дастурига кўра аҳолининг 26 598 та лойиҳасига 453,9 миллиард сўм кредит берилган бўлса, «Ёшлар келажагимиз» дастурига асосан 355 та лойиҳа муаллифига 54 миллиард сўм ажратилган. Аҳолига кредит маблағлари ажратиш борасида вилоят республикада энг юқори ўринда турибди.
Файзулла Ражабовга кўра, имтиёзли кредит ажратилишида асосий эътибор кам даромадли оилаларга қаратилган. Жумладан 11 039 та кам даромадли оилага 40,3 миллиард сўмлик микрокредитлар берилган.
Шунингдек, Шаҳрисабз шаҳрида бўлиб ўтган «Мақом» фестивали олдидан 58 нафар фуқарога уй-меҳмонхона ташкил этиш учун 1,4 миллиард сўм, Чироқчи туманининг Кўкдала ҳудудида экспортбоп тарвуз етиштириш учун 367 нафар фуқарога 1,2 миллиард сўм, аҳоли хонадонларида балиқчиликни ривожлантириш учун 107 нафар фуқарога 2,7 миллиард сўм кредит маблағлари берилган.
Тадбирда сўз олган журналистлар бугунги кунда «Ҳар бир оила — тадбиркор» дастурига кўра, аҳолига шунча маблағ берилган бўлса-да, натижа билан мақтагулик эмаслигини, қолаверса аксарият банкларда кредит сўраб борганларга «лимит» тугаган деган важ кўрсатилаётганини танқид қилди.
Шунингдек, аҳолининг иссиқхона қуриши учун банкдан олаётган кредит маблағлари етмай қолиш ҳолатлари кузатилаётгани, боиси маҳаллий қурувчилар нархни сунъий тарзда ошириб юборганлиги, водий вилоятларидан келган қурувчилар билан келишилганда, олинган кредит маблағлари ҳисобидан уларнинг ҳисоб рақамларига пул ўтказиш имконияти йўқлиги рўкач қилинаётгани кўпчиликни ўйлантираётгани айтиб ўтилди.
Саволларга жавобан вилоят марказий банки бош бошқармаси бошлиғи Файзулла Ражабов агар шундай ҳолат аниқланса, бор пулни бермай туриш ҳолатлари кузатилаётган бўлса, тегишли чора қўлланилишини айтиб, бундай ҳолатларни ошкор қилишда журналистлардан ёрдам кутишини билдирди.
Изоҳ (0)