Бу ҳафта муҳим воқеаларга бой бўлди. Ижтимоий тармоқлар анча қизиди. Тармоқлар нималарни муҳокама қилганини қуйида кўриб чиқамиз.
Ҳафтанинг диққатга сазовор воқеаларидан бири – Миллий тикланиш партияси депутатининг «квартира» сўзини «хонадон»га ўзгартириш борасидаги таклифи кенг муҳокамаларга сабаб бўлди . Аксарият фикрлар салбий бўлди. Кимдир бу воқеани депутатларнинг сайловолди кампаниясида ғимирлаб қолганига йўйса, яна кимдир бундай майда таклифлар ўрнига тузукроқ ташаббуслар кераклиги айтди. Тадбиркор ва блогер Фируз Аллаевнинг мана бу пости остида қолдирилган фикрлардан ҳам буни билиш мумкин:
Машҳур ўзбек-рус миллиардери Алишер Усмоновнинг Наманганда 16 қаватли осмонўпар бино қуриш ташаббусига ҳам турлича ёндошилди. Аммо асосий фикрлар ижобий бўлди. Чет элдаги ўзбек бойлари бундай ишларни кўпроқ қилиши мақсадга мувофиқлиги айтилди. Facebook’даги «Халқ билан мулоқот» гуруҳида мавзу анча қизғин муҳокама қилинди.
Тошкентдаги Oqtepa Lavash тез тановул тармоғи навбатдаги нохушликка дуч келди. Мижозларнинг овқатдан заҳарланиши одамлар эътиборидан четда қолмади. Тармоқ ресторанида таомланган қирққа яқин одам заҳарланиш ташхиси билан шифохонага ётқизилди. Oqtepa Lavash воқеа учун жавобгарликни ўз зиммасига олди.
Асосий муҳокамаларда воқеа навбатдаги фитна деган фикрлар ҳам айтилди. Эслатиб ўтамиз, аввалги шов-шувли воқеа таомдан чиққан суварак билан боғлиқ эди.
Навоийда бўлиб ўтган хунук бир воқеа ижтимоий тармоқларда трендга айланди. Шифокорга нисбатан қўпол муомала бу мавзу ҳали-ҳануз ёпилмаганини тасдиқлайди. Йил давомида шунга ўхшаш ҳодисаларга жуда кўп дуч келдик. Бу сафар навоийлик барзанги шифокорга очиқдан очиқ қўполлик қилди. Воқеа акс этган видео ижтимоий тармоқларда тарқалди. Айтишларича, ҳолат юзасидан жиноий иш қўзғатилиб, тергов ҳаракатлари олиб борилмоқда.
Ўзбекистон халқ артисти иштирок этган мем одамларда қувноқ кайфият уйғотмоқда. Бир пайтнинг ўзида ҳам қизиқ, ҳам аччиқ ҳақиқатни кўрсатадиган ушбу демотиватор жуда кўп гуруҳларда тренддан тушмай келмоқда. Сиз ҳам эҳтимол уни кўргандирсиз.
Пойтахтга келиб, «учёт»га қўймасанг жазоланасан, лекин тошкентлик одам вилоятларда юриб, «учёт»га турмаса, ҳеч қандай жазо йўқ. Шу гапи туфайли танқид остида қолиб кетган ИИВ бошқарма бошлиғи иштирокидаги видео тарқалди. Халқ бу фикрлардан норози, аксар одамлар буни очиқ табақалаш ва тошкентликларни бошқа вилоятликлардан устун қўйиш деб ҳисобламоқда.
Ҳозирча шу, ижтимоий тармоқлардаги трендларни «Дарё»да кузатиб боринг.
Абдулазизхон Акрамов тайёрлади.
Изоҳ (0)