Тошкентда бирламчи бозордан уй сотиб олиш бўйича Тошкентда пропискаси борлар учун бошқача, пропискаси бўлмаганлар учун эса бошқача бож белгиланиши юзасидан изоҳни Ички ишлар вазирлиги (ИИВ)дан эмас, балки Олий Мажлис ёки Вазирлар Маҳкамасидан сўраш керак. Бу ҳақда ИИВ Жамоатчилик ва ОАВ билан алоқлар бошқармаси бошлиғи, генерал майор Қутбиддин Бурхонов журналистлар билан муоқотда айтиб ўтди.
Ахборот ва оммавий коммуникациялар агентлигида 10 июнь куни бўлиб ўтган журналистлар билан мулоқотда Вазирлар Маҳкамасининг 2018 йил 22 октябрдаги 845-сонли қарори билан прописка олиш тартибига киритилган ўзгаришлар муҳокама қилинди. Ўзгаришларга мувофиқ, Тошкент шаҳри ва Тошкент вилояти ҳудудидан қиймати қанча бўлишидан қатъи назар (ҳатто 1 сўм бўлса ҳам), янги қурилган кўчмас мулк сотиб олган фуқароларга доимий прописка берилиши кафолатланган.
Янги қурилган уй-жойни сотиб олганлик учун мулкнинг нархидан 5 фоизлик, лекин энг кам иш ҳақининг бир баробари миқдорида бож тўлаш талаби сақлаб қолинган (божнинг энг кам қиймати), бироқ Тошкент шаҳри ва Тошкент вилоятида доимий пропискаси бўлмаган фуқаролар учун божнинг энг кам миқдори энг кам иш ҳақининг 10 баробари этиб белгиланган. Ўз навбатида, сотиб олинган янги уйни уч йил ичида сотишга қарор қилинса, Тошкентда пропискаси бор Ўзбекистон фуқаролари энг кам иш ҳақининг бир баробари миқдорида, пропискаси йўқлар эса энг кам иш ҳақининг 400 баробари миқдорида бож тўлаши лозим.
Журналистлар ИИВ вакилларидан Ўзбекистоннинг Тошкент шаҳри ва Тошкент вилоятида доимий пропискага эга ва шундай пропискага эга бўлмаган фуқаролари учун нега икки хил, дискриминацион божлар жорий этилгани сабабларини сўраган. ИИВ вакиллари бу саволни ё парламентга, ёки ҳукуматга беришни тавсия қилган.
«Бу қарорни Вазирлар Маҳкамаси қабул қилган, бунга бизнинг алоқамиз йўқ. Сиз сўраётган, талаб қилаётган нарса ваколатимизга кирмайди. Биз ижро этувчи органмиз. Вазирлар Маҳкамаси қандай қарор қабул қилишидан қатъи назар, бажаришга мажбурмиз. Бажармасак, амалдаги қонунчиликка кўра бизга жиноий ёки маъмурий чора кўрилади. Сиз қонун чиқарувчи органга ёки Вазирлар Маҳкамасига мурожаат қилишингиз керак, бизга эмас», — деб жавоб берган генерал майор Қутбиддин Бурҳонов.
Журналист ИИВ ҳам Вазирлар Маҳкамаси таркибига киришини эслатиб, мазкур қонун лойиҳаси ишлаб чиқилаётганда ишчи гуруҳ тузилган-тузилмагани, ишчи гуруҳ таркибида ИИВдан бирор мутасадди бўлган-бўлмаганини сўради. Генерал майор Бурҳонов фуқароларга икки хил қийматда бож белгиланиши ҳақидаги қарор лойиҳаси ишлаб чиқилаётганда ишчи гуруҳда ИИВ вакиллари бўлганини маълум қилди, айни вақтда лойиҳанинг тасдиқланиши ёки бекор бўлишини овозлар ҳал қилишини таъкидлади.
«Бизнинг овозимиз ҳар доим ҳам қабул қилинмайди-ку (‘инобатга олинмайди-ку’, дейилмоқчи — таҳр.), ахир бизнинг овозимиз кўплаб овозлардан биттаси, холос», — деди Бурҳонов. Ўша ишчи гуруҳдаги ИИВ вакили Ўзбекистоннинг Тошкентда пропискаси бор ва йўқ фуқаролари учун икки хил қийматда бож белгиланиши тўғрисидаги таклифга қарши овоз берганми ёки қўллаб-қувватлаганми — бу ҳақида маълумот берилмади.
Изоҳ (0)