Туйғунали Абдураимов Қирғизистон ҳукуматининг Чуй вилоятидаги вакили лавозимидан бўшатилди. Қирғизистон Бош вазири Муҳаммадқалий Абилғазиев шу ҳақдаги фармойишни имзолаган.
Туйғунали Абдураимов 5 июнь куни маҳаллий аҳоли ўртасида можаро юз берган Орок қишлоғидаги ҳодисалар ҳақидаги савол берган мухбир аёлга «Менга сизнинг юзингиз ёқмаяпти. Қиёфангиз ёқимсиз», — дея рад жавобини берган.
Шундан кейин амалдорнинг шаънига танқидлар кучайиб кетди ва кўпчилик унинг истеъфосини талаб қилиб чиқди. Фаолларнинг баёнот беришича, у давлат хизматчиси этикаси билан таниш эмас.
Ҳодисадан бир кун ўтиб, Қирғизистон ҳукуматининг Чуй вилоятидаги вакили матбуот олдига чиқди ва башараси ёқмаётгани учун журналист аёл билан гаплашмагани юзасидан фикрини маълум қилди.
«Мен ‘Ала-Тоо 24’ телеканалига интервью бердим, шунда у қўпол тарзда қаерда бўлганим, нима учун кеч келганимни сўрай бошлади. Шунда у прокурор эмаслиги ва бу менинг муаммоим эканини айтдим. Ҳа, мен унга юзи ёқмаётганини айтдим. Менинг башарам унга ёқмайди. Бу ҳаёт», — дея баёнот берди амалдор.
Чуй вилояти раҳбари айрим журналистларни атайлаб фитна уюштиришни мақсад қилиб олганликда айблар экан, кечирим сўрамади ва журналистлар билан баҳслашганидан кейин шошилинч равишда зални тарк этди.
Бош вазир Муҳаммадқалий Абилғазиев ўшанда ҳукумат вакилининг ҳатти-ҳаракатларига муносиб баҳо берилишини айтган эди.
Изоҳ (0)