Ўзбекистон Японияга қўшимча 28 турдаги мева-сабзавот экспорти бўйича келишувга эришди. Бу ҳақда Ўзбекистон Республикаси Вазирлар Маҳкамаси ҳузуридаги ўсимликлар карантини давлат инспекцияси хабар беради.
Музокаралар натижаларига кўра, Япония томони Ўзбекистондан қишлоқ хўжалик маҳсулотларининг қўшимча 28 турини, яъни хурмо, тарвуз, малина, анжир, ер ёнғоқ, бодом, грек ёнғоғи (ташқи пўстлоғисиз), ловия, мош, кунжут, коврак, жийда, кабачки, айсберг салат барги, укроп, кашнич, петрушка, селдерей, райҳон, руккола, ялпиз, латук, яшил пиёз, пиёз, сабзи, карам, қовоқ ва редискани экспорт қилиш имконини бериш бўйича рухсатномасини тасдиқлади. Ушбу маҳсулотлар карантин назоратидан ўтказилиши ва зарур ҳолларда зарарсизлантириш (фумигациялаш) лозим бўлади.
Маълумот ўрнида қайд этиш жоизки, аввал 26 та мева-сабзавот ва полиз маҳсулоти (қовун, узум, анор, лимон, саримсоқ пиёз, лавлаги, бодринг, қулупнай, хандон писта, шу билан бирга, қуритилган мева-сабзавотлар: ўрик, майиз, олхўри, қовун, олча, гилос, олма, шафтоли, нок, аччиқ қалампир, пиёз, сабзи, картошка, булғор қалампири, нўхот, коврак, қуритилган кўкатлар)ни экспорт қилишга фитосанитар рухсати олинган эди.
Шунингдек, делегация аъзолари Япония Фумигация технологияси ассоциациясида мева-сабзавот маҳсулотларини зарарсизлантириш (фумигациялаш) бўйича ҳамкорликни ривожлантириш мақсадида учрашув ўтказди.
Ташриф доирасида делегация аъзолари фитосанитария соҳасидаги Япония тажрибаси, яъни логистика марказлари, аэропортда ва карантин лабораториясида карантин юкларининг фитосанитария талаблари асосида текшириш усуллари ҳамда экинларнинг карантин назоратидан ўтказиш тартиблари билан яқиндан танишдилар.
Бундан ташқари, учрашувда томонлар икки мамлакатнинг ўсимликлар карантини бўйича илмий-тадқиқот марказлари ўртасида ҳамкорликни йўлга қўйиш, кадрларни тайёрлаш ва қайта тайёрлаш бўйича Япониянинг JICA халқаро ҳамкорлик агентлиги билан фаол ҳамкорлик қилиш юзасидан ҳам келишувга эришди.
Шу билан бирга, Япония томони гилос, аччиқ қалампир, олма, шафтоли ва олхўрини истисно тариқасида Ўзбекистондан экспорт қилишга рухсат бериш масаласини тезлаштириш учун барча имкониятларни ишга солишга тайёр эканликларини билдирди.
Изоҳ (0)