Қоракўл туманида 2 таси давлат-хусусий шерикчилиги асосидаги ва 14 та оилавий бўлган, жами 16 та замонавий болалар боғчаси фойдаланишга топширилди. Бу ҳақда туман ҳокими ўринбосари Ўткир Шарипов маълум қилди.
Туманнинг «Региҳайдар» маҳалласида иш бошлаган 100 ўринга мўлжалланган замонавий мактабгача таълим муассасаси учун 3 миллиард сўмдан зиёд маблағ сарфланган. Шундан 1 миллиард 715 миллионини имтиёзли кредит ташкил этган. «Чандиробод» маҳалласидаги боғча учун эса 2 миллиард 450 миллион сўм ажратилган. «Дўрман», «Хўжалар», «Дўстлик» маҳаллаларидаги мактабгача таълим муассасалари ҳам замонавий кўринишга эга.
Ҳар бир муассасада алоҳида овқатланиш хонаси, ётоқхона, ота-оналар ва болалар кутубхонаси, машғулотлар олиб бориш учун турли гуруҳлар фаолияти йўлга қўйилган. Чўмилиш ҳавзаси, спорт майдончаси ҳамда ўйингоҳ замонавий комплекс асосида болалар ихтиёрига топширилган.
— Туман аҳолисини узоқ йиллардан буён қийнаб келаётган мактабгача таълим муассасалари борасидаги муаммолари ечим топди. 2018 йилда туманда бор-йўғи, 20 та мактабгача таълим муассасаси фаолият кўрсатиб келган, мавжудлари ҳам эътибор ва таъмирга муҳтож эди. 2019 йил март ойи ҳолатида эса улар сони 27 тага етди. Ҳозирда биргина туманнинг ўзида 59 та замонавий мактабгача таълим муассасаси фаолият олиб бормоқда. Айтиш жоизки, ўтган йилда Қоракўл туманида мактабгача таълим қамрови даражаси 18 фоизни ташкил этган бўлса, бу кўрсаткич жорий йилда икки бараварга ортди, яъни 37 фоизга етди. Йил якунига бориб эса 62,5 фоиз 3 ёшдан 7 ёшгача бўлган болалар муассасаларга қамраб олинади, — деди туман ҳокими ўринбосари Ўткир Шарипов.
Маълумотга кўра, Қоракўлни саноат шаҳарчасига айлантириш кўзда тутилган. Маданият маркази биноси, Маҳалла маркази мажмуаси, туман давлат хизматлари маркази, туман ИИБ биноси, Ёшлар маркази ва ёшлар боғи қурилади. Шунингдек, 864 ўринли 15-умумий ўрта таълим мактабини қайта таъмирлаш, 18-умумий ўрта таълим мактабига 300 ўринли янги бино барпо этиш, 1-сонли 140 ўринли мактабгача таълим муассасасини қайта қуриш ишлари ҳам олиб борилмоқда. Бу йирик объектларни барпо этиш ишларига 33 та пудрат-қурилиш ташкилотлари бириктирилган.
Изоҳ (0)