Ўзбекистоннинг Лондондаги элчихонасида iCrossing Британия онлайн-маркетинг агентлигининг туризм бўйича муҳаррири Жереми Ҳидга журналистика соҳасидаги «Олтин қалам» XIV Миллий мукофоти Ташкилий қўмитасининг ҳайкалчаси ва сертификати топширилди. Бу ҳақда ЎзА хабар берди.
Жереми Ҳид «Чет эллик журналистнинг Ўзбекистон ҳақидаги энг яхши материали учун» номинациясида ғолиб деб топилган. Мукофот 2018 йилнинг ноябрь ойида The Financial Times газетасида чоп этилган «Ўзбекистондаги ўта тез юрар ‘Ипак йўли’» мақоласи учун берилган.
Учрашувда жаҳон матбуотида Ўзбекистондаги туризмни ёритиш борасида британиялик журналист ва блогерларнинг амалда ҳал қилувчи рол ўйнаётгани таъкидланди. Биргина 2019 йилнинг сўнгги беш ойида улар томонидан мавзуга оид 120 дан ортиқ материал чоп этилди.
Шу каби мақолалар сабабли Ўзбекистон туризм соҳасидаги қатор Британия махсус журналларининг танловларида, жумладан «Энг тез ривожланаётган туристик йўналиш» ва «Осиёдаги саёҳат қилиш учун яхши жой» номинацияларида ғолиб бўлди.
Ўзбекистон туристик салоҳиятининг Британия ОАВда кенг ёритилиши ва Бирлашган Қироллик фуқаролари учун висасиз тартибнинг жорий қилинганлиги натижасида ушбу мамлакатдан Ўзбекистонга ташриф буюрувчи туристлар сони ўтган йили 40 фоизга, 2019 йилнинг биринчи чорагида эса 100 фоизга ошди.
Тадбирнинг бошқа иштирокчилари ҳам Ўзбекистон билан бўглиқ турли медиа лойиҳаларни амалга ошириш истагини билдирган. Уларга ҳам келгуси йилда «Олтин қалам» танловида иштирок этишлари ҳамда 2019 йилнинг ноябрь ойида Тошкентда ўтказиладиган «Буюк ипак йўлида туризм» халқаро туристик ярмаркасига ташриф буюриш таклиф этилди.
Изоҳ (0)