Намангандаги халқаро инвестицион форумда имзоланган келишувлар сони ўттиздан ошди (фото)

Наманганда «Doing business with Namangan ­­-­ 2019» халқаро инвестиция форуми давом этмоқда. Бу ҳақда «Дарё» мухбири Азизбек Абдувалиев хабар берди.

Тадбирда бевосита иштирок этаётган Бош вазир ўринбосари Азиз Абдуҳакимовнинг қайд этишича, нафақат пойтахт Тошкент, балки ҳудудларда ҳам шундай инвестицон форумлар ташкил этиш режалаштирилган ва уларнинг дастлабкиларидан бири Наманганда ўтказилмоқда. Бундан кўзланган мақсад ҳудудларни дунёга танитиш, уларнинг улкан имкониятларини хорижий инвесторларга кўрсата билишдан иборат.

— Форум доирасида кўплаб тақдимотлар ўтказилди. Наманганнинг турли соҳа ва йўналишлардаги салоҳияти намойиш этилди. Биргина текстиль соҳасини оладиган бўлсак, бугун Наманганда дунёнинг йирик марказларидан бири пайдо бўлмоқда, — деди бош вазир ўринбосари.

«Дарё» нашри учун интервью берган вилоят ҳокими Хайрулло Бозоровнинг таъкидлашича, давлат раҳбари томонидан вилоятларда шундай бизнес форумларни ўтказиш қатъий вазифа қилиб қўйилган. Уларнинг савияси ҳам чет эл инвесторларини қизиқтирадиган даражада бўлиши керак.

— Форумнинг кўламини кўриб турибсиз. 40 дан ортиқ давлат вакиллари, 300 дан ошиқ хорижлик бизнесменлар қатнашмоқда. Ўзбекистонинг чет элдаги 18 нафар элчиси, мамлакатимизда фаолият кўрсатаётган 20 дан ортиқ дипкорпус вакиллари иштирок этяпти. Бу ўз-ўзидан бўлгани йўқ. Ҳукумат томонидан катта ёрдам кўрсатилди, Бош вазирнинг махсус фармойиши қабул қилинди. Ташқи ишлар, Инвестициялар ва ташқи савдо вазирликлари яқиндан кўмак берди. Олдин ўтказилган шу каби инвестицион форумлар тажрибаси асқотди, — деди Хайрулло Бозоров.

Форумда иштирок этаётган меҳмонлар орасида россиялик таниқли сиёсатчи, Давлат думаси депутати, Таълим бўйича қўмита раиси Вячеслав Никоновни учратдик ва суҳбатга тортдик.

—Ўзбекистонга 15 йил аввал келганиимда статика, яъни мудроқ ҳолатни кузатгандим. Бугун эса эса динамикани — шиддат, ривожланишни кўряпман. Жумладан, Наманганда ҳам. Вилоят ва шаҳар раҳбарлари тадбиркорлар, инвесторлар учун қулай муҳит яратишга ҳаракат қилмоқда. Аслида бизнеснинг қоидаси шундай — қаерда яхши шароит ва кафолатлар бўлса, ўша ерга интилади.

Тадбир давомида Наманган шаҳридаги «Давлат хизматлар маркази» биносида 4 та йўналиш — саноат, қишлоқ хўжалиги, туризм ҳамда инновацион ғоялар ва технологияларни жорий этиш мавзуларида сексиялар муҳокамаси ташкил этилди. «Паҳлавон» спорт мажмуасида эса маҳаллий ишлаб чиқарувчиларнинг миллий кўргазмаси бўлиб ўтди. »В2В» форматдаги кооперацион биржада томонлар ўзаро манфаатли шартномалар юзасидан келишиб олди.

Дастлабки маълумотларга кўра, ҳозиргача 35 та келишув ва меморандум имзоланган. Уларнинг жами суммаси 300 миллион доллардан ошиши кутилмоқда.