Қарши шаҳри газ идорасига иши тушган деярли ҳамманинг асосий қарзидан ташқари катта миқдорда пеня ундириб олинмоқда, деб хабар беради ЎзА.
Вазирлар Маҳкамасининг 2018 йил 12 январдаги 22-сон қарорига асосан «Табиий газдан фойдаланиш қоидалари» тасдиқланган. Унда келтирилишича, истеъмолчи ой тугаганидан сўнг 10 кун мобайнида истеъмол қилинган газ ҳажми учун табиий газ истеъмолини ҳисобга олиш приборлари кўрсаткичлари ёки белгиланган меъёрлар асосида тўловни амалга оширади. Тегишли муддатда истеъмол қилинган табиий газ ҳақи ўз вақтида тўланмаган тақдирда, истеъмолчи газ таъминоти ташкилотига қонун ҳужжатларида белгиланган миқдорда пеня тўлайди. Ҳозирда бу миқдор қарз умумий суммасининг 0,1 фоизини ташкил этади.
«Қарзни тўлайман, деб келсам, 235 минг сўм пеня чиқариб ўтирибди. Компьютерга қараб айтишди. Ҳисоблагич бўйича ўтган ой 6 минг сўм ишлаган. Доим ойма-ой тўлов қилиб келганмиз. Ортиқчаси билан 50 минг сўм тўламоқчи эдим. Энди бу аҳвол. Нимага бундай қилишади, ҳайронман. Йўқ жойдан пеня деб турса. Оилада бир ўзим ишлайман. 500 минг сўм маош оламан. Осонмас-да. Қай бирига етказаман?!» — дейди Қарши шаҳри Кат маҳалласида яшовчи Тамара Икромова.
Чақар маҳаллалик Гулбаҳор Худоёрова исмли нафақахўр ўтган ой фойдаланилган табиий газ учун қарздорликни сўндиргани келган. Қарздан қутулгани етмаганидек, абонент дафтарчаси устига 186 минг сўм пеня, деб ёзиб қўйишган.
Бир қарашда бу арзимаган рақамдек кўринади. Айтайлик, истеъмолчининг муддатидан кечиккан 100 минг сўм қарздорлиги бўлса, унга ўтган ҳар бир кун учун 100 сўмдан пеня ҳисобланиши, аммо бу миқдор қарз суммасининг 50 фоизидан ошиб кетмаслиги керак. Демак, фуқароларга ёзиб берилаётган пеня бир ё икки ойда шаклланиб қолмаган. Бугун гарданига ҳатто 2 миллион сўмгача пеня илинган истеъмолчилар борлиги шундай дейишга асос бўлади.
Қарши шаҳри Гулшан маҳалласида истиқомат қилувчи Нигора Ҳамидова хонадонига газ учун 1 миллион сўмдан зиёд пеня ҳисобланган.
«Яшаб турган уйимизни 2017 йилда бировдан сотиб олганмиз. Нотариусдан ўтказгунча, уй эгаси МИБдан газдан қарзи йўқ, деган маълумотнома олиб келиб берувди. Тартиби шундай экан. Бугун билсак, 5—6 йиллигини кўтаришибди. Бизда шунча пеня бор экан. Қизиқ, қарзи бўлмаса, пеня қаёқдан келди?», — дейди Ҳамидова.
Қашқадарё бўйича газ таъминоти филиали директори ўринбосари ушбу масалага ойдинлик киритишга уринган.
«Пеня кеча ё бугун чиққан янгилик эмас, 2005 йилдан бери бор бу чора. Истеъмолчи қарздорлигини ойнинг 10-санасига қадар сўндирмадими, дастур унга пеня ҳисоблаб кетаверади. Ҳаммаси автоматик бажарилади. Фақат 50 фоиздан ўтказмайди. Бу масала нега ҳозир асосий масалага айланди? Чунки илгари эътиборсизлик бор эди-да. Энди халқнинг ўзи қўзғалди. ‘Справка’, шунга ўхшаш у-бу нарса чиқди. Уйни олди-сотди қилаяпти, шунда қарзи йўқлиги ҳақида маълумот олиши керак. Менда пеня борми-йўқми, деб фуқаронинг ўзи қизиқаяпти-да. Аввал бу масалада кам одам мурожаат қиларди. Энди кўпайди. Пеня долзарб бўлгани сабаби ҳам шу», — дейди Қашқадарё бўйича газ таъминоти филиали директори ўринбосари Шокир Қодиров.
Изоҳ (0)