Фарғонада 75 минг сўм қарздорликни деб МИБ ходими калтакланди

Фарғона шаҳрининг Қўқон кўчасида Мажбурий ижро бюроси ходими калтакланди, дея хабар бермоқда «Xabar.uz».

Бюронинг Фарғона шаҳар бўлими давлат инспектори Ш.Қодиров Қўқон кўчасида истиқомат қилувчи фуқаро А.Ф.нинг хонадонига келиб, фойдаланилган электр энергияси учун 75 минг сўмлик қарздорлик ҳосил бўлгани, қонунда кўрсатилган беш кун муддат берилганлигига қарамай, қарз бартараф этилмаганини аниқлаган.

Шу боис ваколати доирасида кейинги ҳаракатларни амалга оширишга мажбур эканини истеъмолчига тушунтиришга ҳаракат қилган. Бироқ фуқаро А.Ф. унга дағдаға қилиб, ҳақорат ва пўписа қила бошлайди.

Давлат инспектори ўзини ҳимоя қилиш мақсадида уяли алоқа воситаси орқали тасвирга олишга тушганда, А.Ф.нинг укаси чиқиб келган. Улар уяли алоқа телефонини олиб қўйиш мақсадида инспекторни бўғиб, бир неча маротаба тепган. Натижада давлат инспекторига тан жароҳати етган.

Айни пайтда Фарғона шаҳар прокуратураси томонидан фуқаро А.Ф.га нисбатан Жиноят кодексининг 219-моддаси 1-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган, дастлабки тергов ҳаракатлари олиб борилмоқда.