«Дарё» таҳририятига Самарқанд шаҳрида яшовчи Раҳмон Мавлонов мурожаат қилиб, унда «Динамо-плюс» ПФК тасарруфидаги Болалар ва ўсмирлар махсус футбол спорт мактаби директори Доноқул Юсупов уни асоссиз равишда ишдан олиб ташлаганлигини баён этган. Шунингдек, аризада футбол спорт мактаби директори ходимлар ва мактаб учун ажратилган пулларни ноқонуний тарзда ўзлаштириб келаётганлиги келтириб ўтилган.
– Футбол мактаби директорининг ноқонуний ишлари юзасидан кўплаб жойларга мурожаат қилдим. Бироқ ҳеч қайси бир ташкилот ишни адолатли кўриб чиқмаяпти. Прокуратура ҳам бу борада бирор бир чора кўргани йўқ, — дейди Раҳмон Мавлонов. – Ҳатто Самарқанд вилояти ҳокими Эркинжон Турдимовнинг сайёр қабулида ҳам бўлдим. Вилоят ҳокими мурожаатимни кўриб чиқишини вилоят прокурорига юклади, прокурор эса бошқа прокурорга юклади. Мана шу тарзда 5 ойдан буён мурожаатим тўлиқ ўрганилмаяпти.
Маълум бўлишича, Раҳмон Мавлонов футбол мактаби директорининг иқтисодий жиноятлари устидан Самарқанд вилоят Давлат молиявий назорати бошқармасига мурожаат қилган. Бошқарманинг «Дарё» мухбири Фарҳод Норбўтаевга тақдим этган 2019 йил 28 февралдаги текширув хулосасига кўра, «Динамо плюс» ПФК тасарруфидаги болалар ва ўсмирлар махсус футбол спорт мактаби ғазначиси Тоштемир Юсупов тамонидан касса китоби юритилмасдан 2018 йилнинг май ойидан 2019 йилнинг 1 январигача жами 65 146 400 сўм ноқонуний равишда харажатга чиқарилганлиги аниқланган.
Текширувлар жараёнида аниқланишича, 2018 йилнинг 26 апрель кунидан Доноқул Юсупов директор бўлиб тайинланган, туғишган укаси Тоштемир Юсупов 2018 йилнинг 5 июль кунига қадар хўжалик ишлари мудири, 2018 йилнинг 21 май кунидан 2019 йилнинг 7 январь кунига қадар ғазначи вазифасида ишлаганлиги маълум бўлган. Шунингдек, директор Доноқул Юсупов ўзининг қудаси I.Тоштурдиевни мактабга психолог сифатида ишга қабул қилиб, кейинчалик мактабнинг касаба уюшмаси раиси этиб сайлаган. Футбол мактабининг амалдаги касаба уюшмаси раиси Ашурбек Рустамов эса ўзини уюшма раислигидан кетганлигидан бехабар.
Мазкур ҳолатда Меҳнат Кодексининг 79-моддаси 1-қисми «Ўзаро яқин қариндош ёки қуда-анда бўлган шахсларнинг (ота-оналар, ака-укалар, опа-сингиллар, ўғил ва қизлар, эр-хотинлар, шунингдек, эр-хотинларнинг ота-оналари, ака-укалари, опа-сингиллари ва болалари) башарти улардан бири иккинчисига бевосита бўйсуниб ёки унинг назорати остида хизмат қиладиган бўлса, бир давлат корхонасида бирга хизмат қилишлари тақиқланади» деган талаби бузилган.
Текширув натижасида Футбол мактаби маъмурияти томонидан Меҳнат Кодексининг 131-моддасида кўрсатилган барча байрам кунлари арафасида кунлик иш муддати барча ходимлар учун камида бир соатга қисқартирилмаганлиги аниқланган. Ушбу ҳолатда Меҳнат Кодексининг 121-моддаси талабига риоя этилмаган. Шунингдек, футбол мактаби иш берувчиси томонидан 2018 йилнинг май ойидан 2019 йил февраль ойига қадар бўш иш ўринлари тўғрисидаги маълумотлар Пастдарғом туман Бандликка кўмаклашиш марказига умуман тақдим қилинмаган. Қолаверса, мактабнинг тренерлик фаолияти билан шуғулланиши юзасидан рухсатномаси мавжуд бўлмаганлиги учун 2018 ва 2019 йилнинг январь ойларида 14 305 400 сўм номутахассислик учун мақсадсиз иш ҳақи тўланган.
– Самарқанд вилоят Давлат молиявий назорати бошқармаси етакчи назоратчи-тафтишчиси I.Убайдуллаевнинг текширувидан қониқиш ҳосил қилмаганим учун бошқарма бошлиғи Музаффар Ҳамдамовдан қайтадан текширув ўтказишини сўрадим, — дейди Раҳмон Мавлонов. – Иккинчи текширувчи Мақсуд Машрабов ҳам директорнинг бир қатор иқтисодий камчиликларини аниқлади. Мени ажаблантирган жиҳати шундаки, биринчи текширувда келган назоратчи-тафтишчи I.Убайдуллаев кўп ҳолатларга кўз юмиб кетган.
Вилоят Давлат молиявий назорати бошқармасининг 2019 йилнинг 21 май куни ўтказган қайта текширув хулосасига кўра муассасада ёқилғи учун ажратилган маблағнинг 892 100 сўмлик метангаз ёқилғиси газ тарқатиш ведомостига мактаб директори Доноқул Юсупов томонидан шахсий автомашинасига чиқим қилинганлиги аниқланган. Бундан ташқари, муассаса ходимларига иш ҳақи ва бошқа тўловлар бўйича 26 ҳолатда 13 921 400 сўмлик ортиқча тўловлар қилинганлиги аниқланган.
– 2018 йилнинг ёз ойларида Тошкент вилоятининг Бекобод, Жиззах вилоятининг Ғаллаорол туманлари ҳамда Навоий шаҳрига тайёрлов гуруҳи мусобақасига шифокор сифатида бордим. Ўша мусобақаларга бир-икки миллион сўм пул берди холос, — дейди Раҳмон Мавлонов. – Мусобақалардан қайтганимиздан сўнг бўш ведомостларга қўл қўйдириб, сўнг ўзлари истаган суммани ёзарди. Мен директорнинг кўплаб ноқонуний ишларига гувоҳ бўлиб қолаётганлигим учун кейинчалик бошқа мусобақаларга мени юбормай қўйди. Директорни болалар соғлиғидан кўра моддий манфаат қизиқтиради.
Самарқанд шаҳар Халқ таълими бўлими бош муҳандиси Олим Қаршиев томонидан назорат-ўлчов йўли билан мактабда бажарилган жорий таъмирлаш ишлари ўрганилганда 9 580 000 сўмлик таъмирлаш ишлари кам бажарилганлиги ойдинлашган.
– Самарқанд шаҳар Халқ таълими бўлими бош муҳандиси Олим Қаршиев текширувга келиб мактабда бажарилган жорий таъмирлаш ишларидаги камчиликларни шунчаки юзаки текширди. Жорий таъмирлаш режасига полларга линолеум қўйилиши керак эди. Бироқ у қўйилмаган. Текширувчи эса линолеумни қўйилган деб ёзиб кетди, — дейди Раҳмон Мавлонов. – Қолаверса, текширувга келган куни эски ромлар алиштирилмаганлиги сабабли текширувчи эртага келишини билдирди. Эртаси кунига директор янги эшикларни олиб келиб ўрнатиб қўйди. Мени ажаблантирган жиҳати шундаки, текширувчи жорий таъмирлаш билан боғлиқ аризангизни ёпиб юборайлик деб менга тўрт миллион сўм пул таклиф қилди.
2018 йилнинг октябрь декабрь ойларида амалга оширилган жорий таъмирлаш ишлари давомида футбол мактабининг кийиниш-ечиниш хонасидаги ҳожатхона эшиги беркитилиб, директор ўзининг хонаси томонидан эшик очдириб олган.
Маълум бўлишича, Самарқанд вилоят Бандлик бош бошқармаси томонидан Раҳмон Мавлоновнинг шикоят аризаси ўрганилиб, футбол мактаби директори Доноқул Юсупов томонидан 2018 йилнинг 29 декабрь кунидаги 50-сонли буйруқ билан Раҳмон Мавлонов ўртасида тузилган меҳнат шартномаси Ўзбекистон Республикаси Меҳнат Кодексининг 105-моддаси билан меҳнат қонунчилигига зид равишда бекор қилинганлигини аниқлаган.
– Мени шикоятимни ўрганиб чиқаётган шаҳар прокурори Хуршид Мусурмонов аниқланган молиявий камчиликлар юзасидан қандай қилиб жиноят иши очиш лозимлигини билмаётганлигини айтди. Прокурор аниқланган ҳолатларни исботлаб беришим керак деб айтди, — дейди Раҳмон Мавлонов. – Самарқанд вилояти Давлат молиявий назорати бошқармаси юз миллиондан ортиқ пулларни ноқонуний ўзлаштириб юборганлиги бўйича маълумот тақдим этиб турган вақтда прокурор нега жиноят иши очишни пайсалга солиб турганлиги мени ажаблантирмоқда.
Маълум бўлишича, Самарқанд вилояти Давлат молиявий назорати бошқармаси Иқтисодий жиноятларга қарши курашиш департаменти Самарқанд шаҳар бўлимига аниқланган камчиликлар бўйича хат йўллаган. Бироқ департамент ҳалигача бирор бир чора кўрмасдан келмоқда.
Раҳмон Мавлоновнинг мурожаатлари асосида Самарқанд вилоят прокуратураси матбуот хизматига иш юзасидан маълумот беришини сўрадик. Бироқ прокуратура матбуот хизмати расмий хат асосида мурожаат қилсакгина маълумот беришини айтди.
Мазкур ҳолат юзасидан Бош прокуратура, Бандлик ва меҳнат муносабатлари вазирлиги, Жисмоний тарбия ва спорт вазирлигининг жавобини кутиб қоламиз.
Изоҳ (0)