4—7 июнь кунлари Тошкент шаҳрида истиқомат қилувчи жами 49 нафар фуқаро «овқатдан токсикоинфекция» ташхиси билан Эпидемиология, микробиология ва юқумли касалликлар илмий текшириш институти клиникасига, 2 ва 5-сонли юқумли касалликлар шифохоналарига ётқизилган.
Мазкур ҳолат юзасидан ўтказилган текширувда ушбу фуқаролар шифохонага мурожаат қилишидан аввал Учтепа тумани Лутфий кўчаси, Сергели тумани Янги Қўйлиқ кўчаси ҳамда Сергели тумани Янги Сергели кўчасида жойлашган «Оқтепа лаваш» умумий овқатланиш тармоғининг учта шохобчасида тез тайёрланувчи таомларни (сендвич, лаваш ва пицца) истеъмол қилганликлари аниқланган.
Ўзбекистон Бош прокуратураси матбуот хизматидан маълум қилишларича, мазкур ҳолат юзасидан 7 июнь куни Тошкент шаҳар прокурори томонидан «Оқтепа лаваш» тармоғига эгалик қилувчи Grand Azia Plus компанияси мансабдор шахслари ва бошқаларга нисбатан Жиноят кодексининг 186-моддаси 4-қисми «б» банди (бошқача оғир оқибатларнинг келиб чиқишига сабаб бўлган истеъмолчиларнинг ҳаёти ёки соғлиғи хавфсизлиги талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилган.
«Ҳозирда жиноят иши бўйича Тошкент шаҳар прокуратураси томонидан тергов ҳаракатлари олиб борилмоқда», — дейилади Бош прокуратура ахборотида.
Аввалроқ Grand Azia Plus раҳбарияти тармоқнинг барча филиаллари ёпилганини маъулм қилгани ҳақида хабар берилган эди.
Изоҳ (0)