7—9 июнь кунлари Хива шаҳрида ўтказилаётган Паҳлавон Маҳмуд номидаги I Халқаро Баҳодирлар ўйинларига Ҳиндистон, Эрон, Япония, Россия, АҚШ, Украина, Латвия, Того, Марказий Осиё мамлакатлари полвонларининг ташрифи кутилмоқда. Бу ҳақда Туризмни ривожлантириш қўмитаси матбуот хизмати хабар берди.
Ўзбекистон Республикаси Туризмни ривожлантириш давлат қўмитаси мамлакатнинг Ҳиндистондаги элчихонаси билан ҳамкорликда 2018 йилги «World Strongman Championship» (WSC) жаҳон чемпионати совриндори Бикрам Сингҳнинг Хивадаги «Баҳодирлар ўйини»га ташрифини ташкиллаштирди. Таниқли ҳинд спортчиси Бикрам Сингҳ Ҳиндистоннинг учкураш (паурлифтинг) бўйича энг кучли спортчилари қаторидан ўрин олган.
Таъкидлаш жоизки, Хива ўйинлари ҳақида видеоролик тайёрлаш учун Ҳиндистоннинг етакчи «DD Sport» телеканали бир гуруҳ ходимлари ҳам Ўзбекистонга келмоқда. Спорт телеканали мухбирлари «Баҳодирлар ўйинлари»ни жонли эфирда тўғридан тўғри ёритишни режалаштиришган. Шуниси диққатга сазоворки, «DD Sport» телеканали аудиторияси кунига 100 миллион томошабинни ташкил қилади.
Мазкур халқаро турнир ўзбек халқининг буюк ўғлони Паҳлавон Маҳмуд хотирасига бағишланган. Паҳлавон Маҳмуд ўз даврининг енгилмас баҳодири ва машҳур файласуфи бўлган.
Изоҳ (0)