НАТО қирувчилари Болтиқ денгизи устида Россия Мудофаа вазирлигига тегишли самолётни тутиб қолди

6 июнь куни Болтиқ флотига ташрифни амалга ошириб, Москвага қайтаётган, ичида Мудофаа вазирлиги ҳузуридаги Жамоатчилик кенгаши делегацияси бўлган Ил-20 ҳарбий транспорт самолётиган иккита қирувчи самолёт ҳамроҳлик қилди, деб хабар беради «MK.ru».

Ил-20 Калининграддаги аэродромдан кўтарилганидан сўнг, унинг чап борти томонида Швеция Ҳарбий-ҳаво кучларига тегишли «Гриппен» қирувчи самолёти пайдо бўлган. У Россия ҳарбий транспорт самолётига 50 метр оралиқда яқинлашган. «Гриппен» Жамоатчилик кенгаши делегациясига ўн дақиқага яқин ҳамроҳлик қилган ва шундан сўнг пастлаган.

Бироқ орадан 30 дақиқа ўтгач, яна бир кузатувчи самолёти пайдо бўлган. Бу сафар НАТОга тегишли F-16 қирувчи самолёти. Самолёт айнан қайси давлатга тегишли эканлигини аниқлашнинг имкони бўлмаган. У бортида россияликлар бўлган самолётни Россия ҳаво чегараларига қадар кузатиб борган.

Биринчи қирувчи самолёт Швеция аэродромидан, иккинчиси эса НАТОнинг Болтиқбўйидаги базасидан кўтарилган.