«Дарё» таҳририятига Хоразм вилояти Хива шаҳрида яшовчи фермер Гулора Жуманиёзовадан мурожаат келиб тушди.
Унда айтилишича, 2019 йилнинг март ойида тадбиркор Жамшид Рўзиметов ноқонуний равишда унинг «Абдушариф боғбон» фермер хўжалиги майдонига кириб, «бу ерни ҳокимлик менга Президент қарорига кўра гидропоника (иссиқхона) учун ажратиб берди. Энди бу ерлар меники» деб кўчатлар униб турган 3.8 гектар боғининг 1.7 гектар майдони олиб қўйиб, паҳса билан ўралган деворларини бузиб, қурилиш ишларини бошлаб юборган.
Гидропоника (иссиқхона) – ўсимликни тупроқсиз сунъий муҳитда ўстириш йўли. Унинг бир неча хил усуллари бор. Одатда ўсимликни майда шағал ва қумда ўстириш усули кўпроқ қўлланилади. Бунинг қулай тарафи, иссиқхона учун махсус унумдор ер зарур эмас. Гидропоника усулида асосан, сабзавот, гул, резавор, мева, чорва моллари ва паррандалар учун сервитамин кўкатлар ўстирилади. Бу йўл билан йилига 4 — 5 марта ҳосил олиш мумкин.Бу борада 2018 йилда 20 ноябрда Шавкат Мирзиёевнинг «Иссиқхона комплексларини ривожлантириш учун қўшимча шарт-шароитлар яратиш чора-тадбирлари тўғрисида»ги қарори имзоланган.
«Энг ажабланарлиси, бизга на ҳокимлик ва на тадбиркор бу ҳақида хабар берди, ёки бирон қонуний ҳужжат кўрсатди. Шаҳар ҳокимлигига еримиз олиб қўйилишининг сабабини сўраб мурожаат қилганимизда, «ер ҳокимликники, хоҳлаган одамидан олади, хоҳлаганига беради,» деган жавобни эшитдик. Ахир шаҳар бедарвоза эмаску, ер олиб қўйилишининг ҳам ўзига яраша қонун-қоидалари бор. Ваҳолангки, «Фермер хўжаликларини ташкил этиш тўғрисида»ги қарорга кўра, ер фермер хўжалигининг ёзма аризасига биноан, мунтазам 3 йил давомида қаровсиз фойдаланилмасдан келган тақдирдагина, суд қарори билан ҳокимлик қайтариб олиши мумкин. Шунда ҳам фермер хўжалиги ёзма равишда огоҳлантирилган ҳолда олиниши керак. Лекин бизни ҳокимлик билан 50 йиллик шартномамиз бўлса ва ҳали ҳеч бир бандини бузмаган бўлсак... Нега энди ҳеч бир сабабсиз кўчатлар униб турган еримиз тортиб олинди?», – дейди биз билан суҳбатда Гулора Жуманиёзова.
Мурожаатда келтирилишича, Гулора Жуманиёзовага тегишли бўлган 3.8 гектар ернинг 1.7 гектар майдони тадбиркор Жамшид Рўзиметовга собиқ Хива шаҳар ҳокими Эркин Ёқубов қарор чиқариб, расмийлаштириб берган.
«Яқинда мурожаатим бўйича шаҳар прокуратурасига мени ва тадбиркор Жамшид Рўзиметовни чақиришди. Шаҳар прокурори унга «вазият ойдинлашгунча уларнинг ерига ўтма, қурилишингни тўхтатиб тур» деб айтди. Лекин у барибир қурилишларини давом эттираяпти. Бундан ташқари Жамшид Рўзметов томонидан фермер хўжалигимизни ўраб турган деворлари бузилиб, униб турган 12 минг кўчатимиз пайҳон қилинди. Биз, еримиз олинди майли, фақат зиён етказилган кўчатларимизни пулини тўланглар дедик. Бунга ҳокимликдагилар рози бўлди. М.Мирзаев номидаги боғдорчилик, узумчилик ва виночилик илмий тадқиқот институти (собиқ Шредер институти) ходимлари томонидан 12 минг дона кўчатларимиз 88 миллион сўмга баҳоланди. Суммани кўриб, ҳокимликдагилар, бизни балансимизда бунча пул йўқ деб айтишди. Энди ким бунинг ҳаққини тўлайди?», – дейди Гулора Жуманиёзова.
Хива шаҳар прокуратураси вазиятни ўрганганда, собиқ шаҳар ҳокими Эркин Ёқубовнинг 2018 йил 21 июлда чиқарган қарори Ер кодексининг 23—24-моддалари ҳамда «Фермер хўжалиги тўғрисида»ги қонуннинг 13-моддаси талабаларига зид равишда қабул қилинганлигини аниқлаган. Шундан сўнг, прокуратура томонидан шу йилнинг 18 май куни қарорни бекор қилиш ва қонунга мувофиқлаштириш бўйича шаҳар ҳокимлигига протест киритган.
Прокуратура томонидан келтирилган протестга қарамасдан тадбиркор Жамшид Рўзиметов Гулора Жуманиёзовага тегишли бўлган ерда қурилиш ишларини давом эттираверган.
Мазкур ҳолатга аниқлик киритиш мақсадида «Дарё» Жамшид Рўзиметов билан боғланди.
Тадбиркорга кўра: «у ерни ҳеч кимдан тортиб олмаган, фермер Гулора Жуманиёзова билан боғланганда у Президент қарори чиққан экан, майли ишингни бошлайвер»,— деб айтганлиги таъкидлади.
«Лекин бир мунча вақт ўтиб, у гаплашганимизни тан олмади. Ўша пайтда Гулора Жуманиёзова билан оғзаки гаплашганимиз учун ҳокимликда буни исботлай олмадим. Иккинчидан, мен унинг буғдой экилган ерига кирдим. Кўчатларига ҳеч қандай зиён етказганим йўқ. Қурилишимни тўхтатишга келсак, тўғри бу борада қарор чиққан, лекин мен ишимни деярли 50 фоизини битириб бўлдим. Банкдан 900 минг доллар олганман. Қурилишга эса бир ярим миллиард сарфлаб бўлдим. Ишимни тўхтатсам, кредитимни, сарфлаб қўйган пулимни ким тўлайди?» – деди Жамшид Рўзиметов.
Икки тадбиркор ўртасида келиб чиққан низони тегишли давлат органлари назоратга олиб, муаммога ечимини топади деган умиддамиз. «Дарё» вазиятни кузатишда давом этади.
Изоҳ (0)