Ўзбекистоннинг Қозондаги бош консули Фариддин Насриев «Татаристан» нашрининг «Таҳририят ошхонаси» рукни учун самарқандча ош пишириб берди, деб хабар қилади Sputnik.
Дипломат Ўзбекистоннинг турли вилоятларида анъанавий ўзбек миллий таоми турлича тайёрланишини сўзлаб берди. Наманган, Андижон, Фарғона, Марғилон, Қўқон, шунингдек, у ердаги қишлоқларда, Сирдарё, Зарафшон, Амурдарё, Бухуро ва Самарқанд ҳудудларида ош тайёрлашнинг юзлаб усуллари мавжуд.
«Ўзим қадимий Самарқанд шаҳриданман, шу сабабли самарқанча ош — энг яхши кўрганим. Уйда, оила даврасида тез-тез шунақа ош пишириб турамиз. Бугун ҳам самарқанча ош пишириб бераман», — дейди Нарсиев.
Дипломатнинг таъкидлашича, ош — ўзбек ошпазлик санъатининг энг юқори нуқтаси.
«У ўз ичига барча технологик жараёнларни мужассамлаштирган: қовуриш, қайнаш ва димлаш. Шу сабабли ош пиширишни билган одам яна бошқа ўнлаб овқатларни тайёрлай олади», — дейди у.
Ош пишгунига қадар дипломат ўз иши ҳақида сўзлаб берди. Унинг айтишича, Насриев қаерда ишлашини ўзи танламаган.
«Дипломатлар давлат танламайди. Биз ўз мамлакатимиз ватанпарварлари каби қаерга жўнатишса ўша ерга кетаверамиз», — дейди у.
Суҳбат давомида дипломат Россия президенти Владимир Путиннинг 2018 йил октябрда Ўзбекистонга амалга оширган ташрифи ҳақида фикр билдириб, уни «тарихий» деб атади.
«27 миллиард доллардан ортиққа битим имзоланди. Ташриф доирасида Россия—Ўзбекистон ўртасида биринчи минтақалараро форум ташкил этилди», — дейди Насриев.
Шунингдек, Фариддин Насриев Ўзбекистонда ўтказилган биринчи минтақалараро форумда фаол иштирок этган Татаристон президенти Рустам Миннихановга ҳамда Татаристон ҳукуматига миннатдорчилик билдирди.
Изоҳ (0)