Самарқандда аёлни зўрлаб, унинг 15 кг пистасини олиб қочиб кетган йигитга суд ҳукми ўқилди

Жиноят ишлари Каттақўрғон туман судида аёлни зўрлаб, унга тегишли писта маҳсулотларини талон-тарож қилган йигитнинг суди бўлиб ўтди.

2017 йил 1 сентябрь куни К.С. соат тахминан 5:00 атрофида Каттақўрғон тумани «Каттақора» қишлоғининг дала-дашт овлоқ ерида темир йўл бўйлаб пиёда «Омонкалхат» қишлоғи томонга кетаётган О.Ж.ни ёлғизлигидан фойдаланиб, куч ишлатиб, қаршилик кўрсатишига қарамасдан уни зўрлаб жинсий алоқада бўлган. Бундан ташқари, К.С. ўзининг жиноий ҳаракатларини давом эттириб, О.Ж.нинг ёнида бўлган баҳоси 250 000 сўмлик 15 килограмм писта маҳсулотини талон-тарож қилиб воқеа жойидан қочиб кетган.

Жиноят ишлари бўйича Каттақўрғон туман судида бўлиб ўтган суд мажлисида судланувчи К.С. ўзига қўйилган айбга қисман иқрорлик билдирган. Унинг судда аниқланган жиноятларни содир этганликдаги айби, жабрланувчи ва гувоҳларнинг кўрсатувлари ҳамда иш бўйича йиғилган далиллар йиғиндиси билан ўз тасдиғини топган.

Жиноят ишлари бўйича Каттақўрғон туман судининг судьяси М.Шерйигитовнинг «Дарё»га маълум қилишича, судланувчи К.С. Жиноят Кодексининг 118-моддаси (номусга тегиш) 1-исми ва 166-моддаси 2-қисми «а» банди (ҳаёт ва соғлиқ учун хавфли бўлмаган зўрлик ишлатим ёхуд шундай зўрлик ишлатиш билан қўрқитиб талончилик қилиш) билан айбли деб топилиб, 4 йил муддатга озодликдан маҳрум қилиш жазоси тайинланган.