Jinoyat ishlari Kattaqo‘rg‘on tuman sudida ayolni zo‘rlab, unga tegishli pista mahsulotlarini talon-taroj qilgan yigitning sudi bo‘lib o‘tdi.
2017-yil 1-sentabr kuni K.S. soat taxminan 5:00 atrofida Kattaqo‘rg‘on tumani “Kattaqora” qishlog‘ining dala-dasht ovloq yerida temir yo‘l bo‘ylab piyoda “Omonkalxat” qishlog‘i tomonga ketayotgan O.J.ni yolg‘izligidan foydalanib, kuch ishlatib, qarshilik ko‘rsatishiga qaramasdan uni zo‘rlab jinsiy aloqada bo‘lgan. Bundan tashqari, K.S. o‘zining jinoiy harakatlarini davom ettirib, O.J.ning yonida bo‘lgan bahosi 250 000 so‘mlik 15 kilogramm pista mahsulotini talon-taroj qilib voqea joyidan qochib ketgan.
Jinoyat ishlari bo‘yicha Kattaqo‘rg‘on tuman sudida bo‘lib o‘tgan sud majlisida sudlanuvchi K.S. o‘ziga qo‘yilgan aybga qisman iqrorlik bildirgan. Uning sudda aniqlangan jinoyatlarni sodir etganlikdagi aybi, jabrlanuvchi va guvohlarning ko‘rsatuvlari hamda ish bo‘yicha yig‘ilgan dalillar yig‘indisi bilan o‘z tasdig‘ini topgan.
Jinoyat ishlari bo‘yicha Kattaqo‘rg‘on tuman sudining sudyasi M.Sheryigitovning “Daryo”ga ma’lum qilishicha, sudlanuvchi K.S. Jinoyat Kodeksining 118-moddasi (nomusga tegish) 1-ismi va 166-moddasi 2-qismi “a” bandi (hayot va sog‘liq uchun xavfli bo‘lmagan zo‘rlik ishlatim yoxud shunday zo‘rlik ishlatish bilan qo‘rqitib talonchilik qilish) bilan aybli deb topilib, 4 yil muddatga ozodlikdan mahrum qilish jazosi tayinlangan.
Izoh (0)