Самарқандда қарз сабабли амакисини пичоқлаган йигит 18 йилга қамалди

Самарқандлик йигит қарз сабабли ўз амакисини пичоқлаб қўйди. Zarnews’нинг хабар беришича, воқеа Паяриқ тумани Деварак қишлоғида содир бўлган.

Маълум бўлишича, Шуҳрат исмли эркак (исмлар шартли) Жиззах вилоятидан ўз ота уйига, яъни, Деварак қишлоғига қайтган. Шу ерда уйланиб, ҳовлининг ўзига тегишли жойидан иморат қурган.

Қишлоққа келиб моддий томондан ўзини тиклаб олганини кўрган жияни Алижон ундан қарз сўраган. Амаки пулга муҳтож жиянига йўқ демасдан сўраган пулини берган. Бироқ пулни олган жиян уни вақтида қайтармаган. Шуҳрат бир неча бор қарзни сўраган. Аммо Алижон қайтармасдан, пайсалга солаверган.

Пулини яхшиликча ололмаслигини билган Шуҳрат қарзини қайтармаса, хотини ва қизларини зўрлаши ҳақида таҳдид ва ҳақорат сўзлари ёзилган хатни жиянининг уйига ташлаб кетган. Алижон хатни амакисининг болаларига кўрсатиб, унга тегишли эканига ишонч ҳосил қилган.

Маст ҳолга бўлган Алижон пичоғини олиб амакисидан қасд олиш мақсадида уйига борган. Амакисини уйида тополмагач, уни қидириб қишлоқ қабристони томон юрганда йўлда учратиб қолган. Улар ўртасида яна пул устида ўзаро жанжал келиб чиққан ва Алижон амакисининг қорнига, сўнгра кўкрагига пичоқ санчган.

Шуҳрат воқеа жойида вафот этган. Қарзини бермаслик эвазига амакисининг умрига зомин бўлган Алижон суд ҳукми билан 18 йилга озодликдан маҳрум этилди.