Жаҳон банки директорлар кенгаши Ўзбекистонда мактабгача таълимни ривожлантириш ва таълимни яхшилашга қаратилган лойиҳани маъқуллади. Бу ҳақда банкнинг Ўзбекистондаги ваколатхонаси «Дарё»га маълум қилди.
«Болаларни ёшликдан рижовлантиришга кўмаклашиш» лойиҳасининг жами қиймати 73,85 миллион долларга баҳоланган бўлиб, унинг 59,5 миллион доллари Халқаро тараққиёт ассоциацияси кредит ҳисобидан, шунингдек, Таълим соҳасида халқаро ҳамкорлик ҳамда Натижаларга асосланган ёндашувлар учун глобал ҳамкорлик ташкилотлари томонидан 14,35 миллион доллар ажратилади.
«Ўзбекистонда давлат томонидан қаратилаётган катта эътиборга қарамасдан 2017 йили 3 ёшдан 7 ёшгача бўлган болаларнинг 29 фоизигина мактабгача таълим муассасаларига қатнаган. Ушбу кўрсаткич бошқа давлатларга нисбатан жуда паст ҳисобланади. Шунингдек, бутун мамлакат бўйлаб мактабгача таълим муассасаларидаги таълим сифатини ҳам яхши деб бўлмайди. Хусусан, тарбиячиларнинг етишмаслиги, уларнинг аксарияти ўрта маълумотга эга эканлиги кузатилмоқда», — дейилади хабарда.
2024 йилда якунланиши кутилаётган лойиҳа юқоридаги кўрсаткични 40 фоизга етказишни кўзда тутади. Бир миллиондан ортиқ бола инфратузилмаси яхшиланган, замонавий мебеллар, ўқув-услубий қўлланмалар, ўйинчоқ ва компьютер техникалари билан жиҳозланган мактабгача таълим муассасаларига қатнайди.
Жаҳон банки Ўзбекистонда 21 та лойиҳани молиялаштириш учун жами 3,5 миллиард доллардан ортиқ маблағ ажратади, шунингдек, мамлакат ҳукумати учун таҳлилий ва маслаҳат хизматларини тақдим этади. Мазкур фаолият макроиқтисодий ислоҳотларни амалга оширишга, қишлоқ хўжалиги ва сув ресурсларини бошқариш тизимини такомиллаштиришга, энергетика, транспорт, соғлиқни сақлаш, таълим, шаҳар иқтисодиёти, сув таъминоти ва санитария соҳаларини ривожлантиришга ёрдам беради.
Изоҳ (0)