Ромитанлик йигитни интим видео билан шантаж қилиб, Gentra автомобилини олиб беришни талаб қилган қиз ва унинг шериклари қўлга олинди

2019 йил 20 май куни Бухоро вилоят ИИБ ЖҚБ ходимлари томонидан ўтказилган тадбир давомида Бухоро шаҳрида яшовчи, 1996 йилда туғилган З.Ж.(аёл) ва унинг шериклари — Ромитан туманида истиқомат қилувчи Б.Қ. (эркак) ва Н.Ғ.(эркак) қўлга олинди.

Вилоят ИИБ матбуот хизматига кўра, йигитлар Ромитан туманида яшовчи, 1991 йилда туғилган Ш.С.(эркак)ни жорий йил апрель ойида З.Ж.(аёл) билан жинсий алоқа бўлганлигини тасдиқловчи видеоёзувларни оиласига кўрсатиб, шарманда қилиш билан қўрқитган. Бунинг эвазига ундан Лаcетт Gentra русумли автомашина олиб бериши талаб қилинган.

Улар жабрланувчини Бухоро шаҳридаги «Ситора-Автосавдо» МЧЖ филиалида З.Ж номига Lacetti Gentra сотиб олиш тўғрисидаги шартномани расмийлаштиришга кўндириб, машина учун 128.679.875 сўм миқдордаги пулларни банкка топширтираётган вақтда ушланган.

Мазкур ҳолат юзасидан шантажчиларга нисбатан ЖКнинг 165-моддаси 3-қисми «а» банди билан жиноят иши қўзғатилиб, Б.Қ.(эркак) ва Н.Ғ.(эркак)га нисбатан гаров, З.Ж.(аёл)га нисбатан қамоққа олиш тарзидаги эҳтиёт чораси қўлланган.

Ҳозирда дастлабки тергов ҳаракатлари олиб борилмоқда.